اسرائیل اور ایران کے ایک دوسرے پر حملے،تہران میں5کاربم دھماکے
تہران، شیراز اور اصفہان میں اسرائیلی فضائیہ کےحملے، جبکہ ایران نےاسرائیلی شہروں پر بیلسٹک میزائلوں کی بارش کردی ہے۔ تہران میں اسرائیلی بمباری کے دوران 5 کار بم دھماکوں کی اطلاعات بھی سامنے آئی ہیں۔
اسرائیلی ڈیفنس فورسز نے اس بات کی تصدیق کی ہے کہ ایران کے جوہری پروگرام اور فوجی صنعتوں کو نشانہ بنانے کے لیے فضائی کارروائیاں کی جا رہی ہیں۔تازہ کارروائی میں اسرائیلی طیاروں نے اصفہان کی جوہری تنصیبات پر حملہ کیا، جس میں ایران کے یورینیم افزودگی کے بنیادی ڈھانچے کو تباہ کرنے کا دعویٰ کیا گیا۔
تہران کے مغربی علاقے میں واقع شاہ ران آئل ڈپو، فجر جام گیس فیلڈ اور جنوبی فارس گیس فیلڈ جو دنیا کی سب سے بڑی گیس فیلڈز میں شمار ہوتی ہے کو بھی حملے کا نشانہ بنایا گیا۔
ایرانی حکام نے بھی تصدیق کی ہے کہ مغربی تہران میں شاہ ران آئل ڈپو پر حملے کے بعد وہاں آگ بھڑک اٹھی۔ ذرائع ابلاغ کے مطابق اسرائیل نے تہران کی ارمیا ملٹری بیس پر بھی فضائی حملہ کیا، جس کے نتیجے میں پاسدارانِ انقلاب کے کم از کم 4 اہلکار شہید ہوگئے۔
ایرانی مسلح افواج نے اسرائیلی حملوں کے جواب میں ’آپریشن وعدہ صادق 3‘ کے تحت مقبوضہ فلسطینی علاقوں پر میزائل حملوں کا نیا سلسلہ شروع کردیا ہے۔ مہر نیوز ایجنسی کے مطابق ایران نے شمالی اور وسطی اسرائیل میں متعدد فوجی اور حساس مقامات کو نشانہ بنایا ہے۔
اسرائیلی میڈیا کی رپورٹس کے مطابق ایران کے میزائل حملوں کے بعد تل ابیب، اشکلون، حیفہ اور طبریہ میں خطرے کے سائرن بجنا شروع ہو گئے، اور شہریوں کو ہدایت دی گئی کہ وہ فوری طور پر قریبی بم شیلٹرز میں پناہ لیں۔
