قطر پر اسرائیلی حملہ : قطری وزیراعظم آج صدر ٹرمپ سے ملاقات کریں گے

: قطر کے وزیراعظم شیخ محمد بن عبدالرحمان الثانی آج امریکی صدر ڈونلڈ ٹرمپ سے ملاقات کریں گے، جس میں اسرائیلی حملے کی مذمت، غزہ میں سیز فائر معاہدے اور یرغمالیوں کی رہائی پر تبادلہ خیال کیا جائے گا۔

غیر ملکی خبر ایجنسی کے مطابق قطری وزیراعظم کی امریکی صدر کے علاوہ نائب صدر جے ڈی وینس، وزیر خارجہ مارکو روبیو اور نمائندہ خصوصی اسٹیو وٹکوف سے بھی ملاقاتیں متوقع ہیں۔

ذرائع کے مطابق ملاقات میں 9 ستمبر کو دوحہ پر ہونے والے اسرائیلی حملے اور یرغمالیوں کی رہائی کے معاہدے کی موجودہ صورتحال پر بات چیت ہوگی۔

قبل ازیں اقوام متحدہ کی سلامتی کونسل نے اسرائیل کا نام لیے بغیر قطر پر حملے کی متفقہ مذمتی قرارداد منظور کی تھی۔ اجلاس سے خطاب کرتے ہوئے قطری وزیراعظم نے کہا کہ اسرائیل نے دوحہ پر حملہ کر کے سفارتکاری کی توہین کی ہے اور غزہ میں جنگ بندی کی کوششوں کو سبوتاژ کیا ہے۔

انہوں نے سلامتی کونسل کو یقین دہانی کرائی کہ قطر غزہ میں جنگ بندی کے لیے اپنی سفارتی اور انسانی کوششیں بھرپور انداز میں جاری رکھے گا۔

یاد رہے کہ اسرائیل نے 9 ستمبر کو دوحہ میں حماس رہنماؤں کے اجلاس پر حملہ کیا تھا جس میں سینئر رہنما خلیل الحیا کے بیٹے اور معاون سمیت چھ افراد شہید ہوگئے تھے۔