لاہور ایک بار پھر دنیا کا آلودہ ترین شہر قرار

لاہور سمیت پنجاب کے مختلف شہروں میں صبح کے وقت فضائی آلودگی کی شدت بدستور برقرار ہے۔

فضائی آلودگی کے عالمی ادارے آئی کیو ایئر کے مطابق لاہور آج بھی دنیا کے آلودہ ترین شہروں کی فہرست میں پہلے نمبر پر موجود ہے، جہاں صبح کے وقت ایئر کوالٹی انڈیکس (AQI) 420 ریکارڈ کیا گیا۔

لاہور میں فضائی آلودگی خطرناک حدوں کو چھو رہی ہے، جبکہ صوبے کے دیگر شہر بھی مضرِ صحت فضا کا شکار ہیں۔ فیصل آباد میں پارٹیکیولیٹ میٹرز کی مقدار 622، ملتان میں 485 اور بہاولپور میں 255 ریکارڈ کی گئی۔

طبی ماہرین نے شہریوں کو مشورہ دیا ہے کہ وہ ماسک پہننے، غیر ضروری طور پر باہر نکلنے سے گریز کرنے اور احتیاطی تدابیر اختیار کرنے پر عمل کریں۔

رپورٹ کے مطابق، دنیا کے آلودہ ترین شہروں میں بھارتی دارالحکومت نئی دہلی دوسرے، ڈھاکا تیسرے، اور کلکتہ چوتھے نمبر پر ہیں، جبکہ کراچی 165 اے کیو آئی کے ساتھ پانچویں نمبر پر موجود ہے۔