امریکا اور جاپان کے درمیان نایاب معدنیات کی فراہمی کا معاہدہ
امریکا اور جاپان کے درمیان نایاب اور قیمتی معدنیات کی فراہمی سے متعلق معاہدے پر دستخط ہو گئے۔
غیر ملکی میڈیا کے مطابق امریکی صدر ڈونلڈ ٹرمپ نے جاپان کی نومنتخب وزیراعظم سنائے تاکائچی سے ٹوکیو میں ملاقات کی، جس کے دوران دونوں رہنماؤں نے معدنی وسائل کی فراہمی کے معاہدے پر دستخط کیے۔
اس موقع پر صدر ٹرمپ نے کہا کہ امریکا کو جاپان کی جانب سے فوجی ساز و سامان کے آرڈر موصول ہو چکے ہیں۔ ان کے مطابق امریکا اور جاپان کے درمیان تجارتی معاہدہ انتہائی منصفانہ اور متوازن ہے۔
رپورٹس کے مطابق ٹرمپ کے اس دورۂ جاپان کے دوران دونوں ممالک کے درمیان تجارت اور سیکیورٹی کے امور پر بھی تبادلۂ خیال کیا جائے گا، جب کہ جہاز سازی، سویا بین اور قدرتی گیس کے شعبے بھی بات چیت کے ایجنڈے میں شامل ہیں۔
