اٹلی میں چوری ہونے والی نایاب پینٹنگ اے آئی کی مدد سے برآمد

اٹلی میں پولیس نے مصنوعی ذہانت کی مدد سے 17ویں صدی کا ایک نایاب فن پارہ بازیاب کرلیا ہے، جو تقریباً 20 سال قبل چرچ سے چوری ہوا تھا۔

پینٹنگ 11 اگست 2004 کو نیپلز کے قریب واقع ایک چرچ سے غائب ہوئی تھی۔ اس میں سینٹ ایگنس کی تصویر بنی ہوئی تھی، تاہم چوروں نے اسے تبدیل کرکے ایک عام نوجوان خاتون کی تصویر جیسا بنا دیا تھا۔ جدید ٹیکنالوجی نے اس کے اصل فن پارے سے مماثلت کا سراغ لگانے میں مدد دی۔

بین الاقوامی میڈیا کے مطابق اکتوبر 2024 میں اٹلی کے شہر پارما میں قدیم نوادرات کے سالانہ میلے کے دوران پولیس اہلکار مختلف فن پاروں کی تصاویر لے کر انہیں ڈیٹا بیس میں شامل کر رہے تھے۔ اسی عمل کے دوران چند گھنٹوں میں اے آئی سسٹم نے ایک مشکوک پینٹنگ کی نشاندہی کردی۔ بعدازاں رنگوں، نمونوں اور تصویر کی ساخت کا موازنہ کرکے اس فن پارے کی اصل شناخت سامنے آگئی۔