ترک زلزلہ زدگان کیلئےملینز ڈالرز دینے والا پاکستانی کون ہے؟
ترکیہ اور شام میں آنے والے ہولناک زلزلے سے بھاری مالی و جانی نقصان کے باعث دنیا بھر میں امداد کا سلسلہ جاری ہے لیکن اس کارخیر میں پاکستانی تاجر سب پر بازی لے گئے ہیں، جی ہاں! امریکہ میں دور جدید کی ’’جیمینائی بیٹری‘‘ کے موجد ’’مجیب اعجاز‘‘ نے اس وقت دنیا کو ورطہ حیرت میں ڈال دیا جب وہ نام ظاہر کیے بغیر خاموشی سے 30 ملین ڈالر(تقریباً 9 ارب روپے ) کی امداد کا عطیہ دے کر چلتے بنے۔
ایک نامعلوم شخص کی جانب سے اتنی بڑی امداد سے سب حیران رہ گئے اور اس شخصیت کے متعلق جاننے میں مصروف ہوگئے جن کا انکشاف اب ہوا ہے، دنیا کی طاقتور ترین بیٹری کی ایجاد کرنے والے موجد “مجیب اعجاز” ایک پاکستانی ہیں جو امریکا میں ون نیکسٹ انرجی نامی کمپنی چلا رہے ہیں۔جیمینائی نامی یہ بیٹری صرف ایک چارج میں کسی الیکٹرگ گاڑی کو 752 میل یا 1200کلومیٹر تک کا طویل سفر کرنے کے قابل بنا سکتی ہے۔مجیب اعجاز کی امریکا میں “ون نیکسٹ انرجی” کے نام سے کمپنی بہت تیزی سے ترقی کی منازل طے کررہی ہے۔
مجیب اعجاز کی “جیمینائی بیٹری” 21ویں صدی کی سب سے بڑی ایجادات میں سے ایک مانی جا رہی ہے، مجیب نے اپنی کمپنی کی بنیاد ہی اِس مقصد کے ساتھ رکھی کہ وہ الیکٹرک گاڑیاں تیار کرنے والی کمپنیوں کیلئے ایک ایسی جدید ترین بیٹری تیار کریں گے جو اِن کے ایک چارج میں زیادہ طویل سفر طے کرنے کے مسئلے کو حل کر سکے۔لیکن مجیب اعجاز کے پاس اپنی کوئی ذاتی پراپرٹی یا ایسی کوئی چیز نہ تھی جسے فروخت کرکے وہ کسی ایسی کمپنی کا آغاز کر سکتے جو مستقبل کی جدید بیٹریاں تیار کرے، ایسے میں انہوں نے اپنا پلان بل گیٹس اور امیزون کے جیف بیزوس کے سامنے رکھا۔
دونوں شخصیات کو اِن کا پلان پسند آیا اور انہوں نے مجیب کی کمپنی میں 25ملین ڈالر(تقریباً 4ارب 50 کروڑ پاکستانی روپے) کی سرمایہ کاری کر دی اور آج مجیب نے ’’جیمینائی بیٹری‘‘ تیار کر کے بل گیٹس اور جیف بیزوس کی سرمایہ کاری کو درست ثابت کیا۔مجیب اعجاز کی “جیمینائی بیٹری” کو ایلون مسک کی ٹیسلا موٹرز کی جانب سے اپنی گاڑیوں کے نئے ماڈل “ایس” کے لیے منتخب کرنا، نہ صرف مجیب کیلئے بڑی کامیابی ہے بلکہ پاکستان اور پوری پاکستان قوم کیلئے باعث فخر ہے۔
آج جبکہ دنیا کی بڑی بڑی ٹیک کمپنیوں میں انڈیا کے سی ای اوز CEOs ہیں جیسا کہ گوگل اور مائیکروسافٹ وغیرہ، ایسے میں مجیب اعجاز نے ثابت کیا ہے کہ پاکستانی بھی اتنے ہی باصلاحیت ہیں۔مجیب سے متعلق دلچسپ بات یہ ہے کہ وہ دنیا کی سب سے بڑی اسمارٹ فون ساز کمپنی “ایپل” میں بطور سینئر ڈائریکٹر بھی اپنی خدمات انجام دے چکے ہیں اس کے علاوہ وہ امریکہ کی ایک بڑی آٹو موبائل کمپنی “فورڈ” موٹرز سے بھی وابستہ رہے ہیں۔واضح رہے کہ مجیب اعجاز پاکستان میں میمو گیٹ اسکینڈل سے مشہور ہونے والے شخص منصور اعجاز کے بھائی ہیں۔ انہوں نے فنانشل ٹائمز میں ایک مضمون میں حسین حقانی کے ساتھ اپنی گفتگو کی بابت لکھا تھا۔
