اداکار دانش تیمور کو بالی ووڈ سے کونسی بڑی آفر ہوئی؟
گزشتہ برس ڈرامہ سیریل ’’کیسی تیری خود غرضی‘‘ سے ڈرامہ انڈسٹری میں مقبولیت کے جھنڈے گاڑنے والے اداکار دانش تیمور نے انکشاف کیا ہے کہ انہیں بھارتی فلم انڈسٹری سے کام کی آفر ہوئی تھی۔اداکار کے مطابق انہیں کرینہ کپور کے ساتھ فلم میں سائن کیا گیا تھا لیکن اداکارہ کے حاملہ ہونے اور پاک بھارت کشیدگی کے بعد یہ پراجیکٹ مکمل نہیں ہو سکا ہے۔دانش تیمور کے مطابق ماضی میں انہیں بالی وڈ کی بے بو کہلانے والی اداکارہ کرینہ کپور کے ساتھ کام کرنے کی پیش کش ہوئی تھی اور ان کا کردار تک فائنل ہو گیا تھا، دانش تیمور کو زیادہ تر ڈرامے کے کرداروں کی وجہ سے پہچانا جاتا ہے اور وہ اپنے کرداروں کی وجہ سے پڑوسی ملک بھارت میں بھی شہرت رکھتے ہیں۔
حال ہی میں وہ ایکسپریس ٹی وی کے ایک شو میں شریک ہوئے، جہاں انہوں نے شوبز کے مختلف معاملات سمیت دیگر معاملات پر بھی کھل کر باتیں کیں، پروگرام میں ایک سوال کے جواب میں انکشاف کیا کہ 5 سال قبل انہیں بھارت سے کام کی پیش کش ہوئی تھی اور بالی وڈ فلم میں ان کا کردار تک فائنل کردیا گیا تھا۔دانش تیمور نے بتایا کہ انہیں کرینہ کپور اور سونم کپور کی فلم ’ویرے دی ویڈنگ‘ میں کام کرنے کی پیش کش ہوئی تھی، ان کا کہنا تھا کہ فلم میں ان سمیت سینئر اداکار جاوید شیخ کو بھی کاسٹ کیا گیا تھا لیکن فلم کی شوٹنگ شروع نہیں ہو سکی۔
انہوں نے بتایا کہ فلم کی ٹیم نے ان سے معذرت کرتے ہوئے انہیں کرینہ کپور کے ہاں بچے کی پیدائش تک انتظار کرنے کا کہا لیکن تب تک پاکستان اور بھارت کے درمیان کشیدگی بھی ہوگئی اور وہ فلم کا حصہ نہ بن سکے، دانش تیمور کے مطابق پاک بھارت کشیدگی کے بعد فلم کی ٹیم نے ان سے معذرت کرلی تھی۔اداکار نے بتایا کہ کرینہ اور سونم کپور کے ساتھ کام کی پیش کش پر ان کی اہلیہ عائزہ خان کافی خوش ہوئی تھیں مگر افسوس کہ قسمت میں ان کا بالی وڈ میں کام کرنا نہیں لکھا ہوا تھا، اداکار کا کہنا تھا کہ انہوں نے پہلے کبھی معاملے پر کہیں بات نہیں کی۔
اگرچہ دانش تیمور نے انکشاف کیا کہ انہیں ’ویرے دی ویڈنگ‘ میں کام کی پیش کش ہوئی تھی، تاہم انہوں نے واضح نہیں کیا کہ انہیں فلم میں کس کردار کی پیش کش ہوئی تھی تاہم 2018 میں ریلیز ہونے والی فلم ’ویرے دی ویڈنگ‘ میں مرد کے کردار اہم نہیں تھے، فلم چار خواتین کے اہم کرداروں پر بنائی گئی تھی۔فلم میں کرینہ کپور، سوارا بھاسکر اور شیکا تلسانی اور سونم کپور نے مرکزی کردار ادا کیے ہیں اور یہ فلم دہلی سے تعلق رکھنے والی 4 سہیلیوں کے گرد گھومتی ہے جنہیں شادی کی تیاریوں کے دوران نشیب و فراز کا سامنا ہوتا ہے، فلم میں چاروں سہیلیوں کو کرینہ کپور کی شادی کی تقریبات میں مختلف موضوعات پر روایات سے ہٹ کر گفتگو کرتے دکھایا گیا ہے۔
فلم کی کہانی اور موضوع کی وجہ سے بھارت میں کافی پذیرائی ملی تھی، تاہم پاکستان میں اس کی نمائش پر جزوی پابندی عائد کی گئی تھی اور بعد ازاں دونوں ممالک میں کشیدگی کی وجہ سے پاکستان میں بھی بھارتی فلموں کی نمائش پر مکمل پابندی عائد کر دی گئی تھی۔
