ندا یاسر کو ’’سی ایس ایس‘‘ کرنے کا مشورہ کس نے دیا؟
پنڈی ایکسپریس شعیب اختر کے پروگرام کے دوران ورلڈکپ سے متعلق سوالات کے غلط جواب دینے پر مارننگ شو ہوسٹ ندا یاسر ایک مرتبہ پھر میڈیا ٹرولنگ کی زد میں آ گئی ہیں جبکہ اداکار یاسر حسین نے ندا کو سی ایس ایس امتحان دینے کا مشورہ دے ڈالا۔
پاکستانی اداکار یاسر حسین نے مارننگ شو کی میزبان ندا یاسر کے حالیہ وائرل کلپ پر تبصرہ کیا ہے، کچھ روز قبل ڈیجیٹل پلیٹ فارم اردو فلکس پر راولپنڈی ایکسپریس شعیب اختر کے پروگرام کا ایک کلپ وائرل ہوا جس میں پاکستان کی دو معروف مارننگ شو ہوسٹ ندا یاسر اور شائستہ لودھی بطور مہمان شریک ہوئیں۔
ندا سے شعیب اختر نے پاکستان کے ورلڈ کپ جیتنے سے متعلق سوال پوچھا جس پر وہ ڈگمگاگئیں، اسی وائرل کلپ پر جہاں سوشل میڈیا صارفین نے ندا یاسر پر تنقید کی اور میمز بنائیں وہیں یاسر حسین نے بھی تبصرہ کیا جس سے یہ واضح نہ ہوسکا کہ یاسر ندا پر طنز کر رہے ہیں یا ان کی حمایت کر رہے ہیں۔
یاسر حسین نے انسٹا گرام پر سٹوری پوسٹ کی اور لکھا کوئی بھی شخص اگر صبح صبح 2 گھنٹے کا لائیو شو کرے گا تو اس کا بھی دماغ اتنا ہی چلے گا، انہوں نے اسٹوری میں ندا کو مینشن کیا اور کہا ‘میرے خیال میں ندا کیوٹ ہیں اور میرے خیال سے انہیں سی ایس ایس (مقابلے) کا امتحان دینا چاہئے۔
اس سے قبل ندا یاسر نے ٹرولنگ کرنے والوں کو آڑے ہاتھوں لیتے ہوئے سوشل میڈیا پر اسٹوری پوسٹ کی تھی، ندا نے انسٹاگرام اسٹوری پر لکھا کہ ایسا میں نے کیا کر دیا؟ لوگ اپنی تاریخ پیدائش اور شادی کی تاریخ اوربہت کچھ بھول جاتے ہیں۔
انہوں نے لکھا کہ مجھے معلوم ہے کہ حالات کی وجہ سے بہت ڈپریشن ہے، اگر میری کسی غلطی سے آپ کے چہرے پر مسکراہٹ آ رہی ہے تو کھل کر ہنسیں لیکن جس کو اللہ رکھے اس کو کون چکھے، ندا یاسر نے کہا کہ جو مجھ سے واقعی پیار کرتے ہیں وہ کرتے رہیں گے، اس لیے میرا نعرہ ہے پیچھے ہٹ!
دوران پروگرام شعیب اختر نے ندا یاسر سے سوال کیا کہ پاکستان 1992 کا ورلڈ کپ کب یعنی کس سال جیتا تھا؟ سوال کے جواب پر ندا یاسر پہلے کنفیوز ہوئیں اور شائستہ لودھی کو دیکھتے ہوئے جواب دیا ’2006 میں جیتا تھا؟ جس پر شائستہ نے نفی میں سر ہلایا اور پھر ندا یاسر نے دوبارہ جواب دیا ’1996 میں جیتا تھا؟
ندا یاسر نے شائستہ کو مخاطب کرتے ہوئے کہا کہ ’ایک منٹ میں اپنی ذہین دوست سے پوچھتی ہوں‘ جس پرشائستہ نے جواب دیا ’1992 میں جیتا تھا، ویڈیو میں دیکھا جا سکتا ہے کہ شعیب اختر شائستہ کو جواب دینے سے بار بار روک رہے ہیں۔
بعدازاں ندا یاسر نے شعیب اختر کو دوبارہ سوال کرنے کا کہا جس پر شعیب اختر نے سوال تبدیل کرتے ہوئے کہا کہ پاکستان نے ٹی ٹوئنٹی کا 2009 کا ورلڈ کپ کب جیتا تھا؟‘ جس پر ندا یاسر نے فوراً جواب دیا ’1992 میں جیتا تھا جس پر شائستہ لودھی نے کہا کہ ’غور سے سوال تو سن لو‘۔
یہ ویڈیو وائرل ہونے کے بعد سوشل میڈیا صارفین نے ندا یاسر پر کافی میمز شیئر کیے اور ٹرول کیا تھا۔
عمران اور جنرل فیض دہشتگردی کے ذمہ دار کیوں ہیں؟
