بالی ووڈ سٹار دپیکا پڈوکون کی ٹائم میگزین میں دھوم

یہ کہنا غلط نہ ہوگا کہ بالی وڈ سٹار دپیکا پڈوکون کا ستارہ آج کل خوب عروج پر ہے، بلاک بسٹر فلم ’’پٹھان‘‘ کے بعد معروف عالمی ٹائم میگزین نے بھی اداکارہ کی تعریفوں کے پل باندھتے ہوئے دنیا کی توجہ بالی ووڈ کی طرف مبذول کرانے کا کریڈٹ دپیکا کو دے دیا ہے۔

امریکا کے ٹائم میگزین کو دیئے جانے والے انٹرویو میں دپیکا پڈوکون نے ہندوستان میں سیاسی ردعمل کا سامنا کرنے اور آسکر میں ہندوستان کی نمائندگی کرنے کے حوالے سے بات کی، اسی انٹرویو میں دیپیکا پڈوکون کو دنیا کے سب سے زیادہ آبادی والے ملک کی مقبول ترین اداکارہ قرار دیا گیا ہے۔

ٹائم میگزین کے سر ورق پردیپیکا پڈوکون کو ہلکے بھورے رنگ کے بڑے سائز کا سوٹ پہنے دیکھا جا سکتا ہے جبکہ انہوں نے پاؤں میں کوئی جوتا نہیں پہن رکھا، میگزین کے سر ورق پر دپیکا کی تصویر کے ساتھ ’’دی گلوبل سٹار‘‘ لکھا ہوا دیکھا جا سکتا ہے۔2018 میں دپیکا پڈوکون کا نام ٹائم میگزین کی 100 بااثر افراد کی فہرست میں بھی شامل تھا۔

میگزین کو انٹرویو دیتے ہوئے انہوں نے اپنے خلاف مسلسل سیاسی ردعمل کے حوالے سے بات کرتے ہوئے کہا کہ مجھے نہیں معلوم کہ مجھے اس کے بارے میں کچھ محسوس کرنا چاہئے یا نہیں لیکن سچ یہ ہے کہ مجھے اس کے بارے میں کچھ محسوس نہیں ہوتا۔

دپیکا پڈوکون کی فلم پدماوت بالی ووڈ کی سب سے زیادہ متنازعہ فلم رہی ہے۔ سنجے لیلا بھنسالی کی ہدایت کاری میں بننے والی اس فلم کو انتہا پسند جماعت شری راجپوت کرنی سینا کی جانب سے احتجاج کا سامنا کرنا پڑا، اس کے علاوہ بھارت کے دارالحکومت نئی دہلی میں واقع مشہور جواہر لعل نہرو یونیورسٹی میں جنوری 2020میں ہونے والے حملے کے بعد اظہار یکجہتی کیلئے یونیورسٹی جانے پر بھی اداکارہ کو مخالفت کا سامنا کرنا پڑا، 2023 میں ریلیز ہونے والی فلم پٹھان کے گانے میں دپیکا پڈوکون کے زعفرانی رنگ کے لباس پر بہت زیادہ تنقید کی گئی۔

دپیکا پڈوکون نے آسکرز میں ہندوستان کی کارکردگی کے حوالے سے بات کرتے ہوئے کہا کہ مجھے نہیں لگتا کہ ہمیں ایک گانے اور ایک دستاویزی فلم میں آسکر حاصل کر کے خوش ہونا چاہئے، مجھے اُمید ہے کہ ہم اسے ایک موقع کے آغاز کے طور پر دیکھ سکتے ہیں۔

رواں سال انڈیا کی دی ایلیفینٹ وِسپرز 95ویں اکیڈمی ایوارڈز میں بہترین مختصر دستاویزی فلم قرار پائی تھی جبکہ تیلگو زبان کی ہٹ فلم آرآر آر کے گانے ناٹو ناٹو نے آسکر اپنے نام کیا، یہ پہلا ہندوستانی گانا ہے جس نے آسکر ایوارڈ جیتا۔

دپیکا پڈوکون سدھارتھ آنند کی سب سے بڑی ہٹ فلم پٹھان کے بعد ایکشن سے بھرپور ان کی اگلی فلم فائٹر میں بھی نظر آئیں گی جو اگلے سال 25 جنوری کو ریلیز ہوگی۔