اسلامی تعاون تنظیم کا عرب منصوبے کے تحت غزہ کی تعمیر نو کی حمایت کا اعلان

اسلامی تعاون تنظیم نے غزہ سے متعلق امریکی صدر ٹرمپ کے منصوبے کے خلاف عرب لیگ کے متبادل منصوبے کی توثیق کردی۔

جدہ میں اسلامی تعاون تنظیم ( او آئی سی) کے وزرائے خارجہ کا اجلاس ہوا جس میں پاکستان کی نمائندگی وزیر خارجہ اسحٰق ڈار نے کی۔اجلاس میں رکن ممالک نے عرب منصوبے کےتحت غزہ کی تعمیر نو کی حمایت کی۔

سربراہ او آئی سی حسین ابراہیم طحہٰ کاکہنا تھاکہ عرب لیگ کی جانب سے غزہ کی تعمیر نو کے منصوبے کی حمایت کرتےہیں، فلسطینی عوام کی جبراً نقل مکانی جیسے بیانات کو مسترد کرتےہیں۔

اسلامی تعاون تنظیم کے وزرائے خارجہ کے اجلاس میں وزیر خارجہ اسحٰق ڈار نے کہاکہ اسرائیل فلسطینیوں پر مظالم بند کرے،پاکستان فلسطینی بھائیوں کےساتھ کھڑا ہے۔

واضح رہےکہ گزشتہ دنوں عرب ممالک کا قاہرہ میں غیر معمولی اجلاس ہوا تھا جس میں مصر نے ٹرمپ کی تجویز کو مسترد کرتےہوئے غزہ کی تعمیر نو کےلیے ایک ایسا منصوبہ پیش کرنےکا اعلان کیا جو فلسطینیوں کے حقوق کا احترام کرےاور انہیں ان کی سرزمین پر برقرار رکھے گا۔

مصر کے غزہ کےحوالے سے 53 ارب ڈالر کے مجوزہ 5 سالہ منصوبے میں لاکھوں مکانات،تجارتی بندرگاہ اور ائیرپورٹ کی تعمیر شامل ہے جب کہ فلسطینی علاقوں میں انتخابات اور دو ریاستی حل کی کوششیں بھی منصوبےکا حصہ ہے۔

اجلاس کے اختتام پر عرب لیگ کےسیکرٹری جنرل احمد ابوالغیط نے اعلان کیاتھا کہ مصر کا منصوبہ اب ایک عرب منصوبہ بن چکا ہے۔

یمن حوثیوں کی اسرائیل کو غزہ کی ناکہ بندی ختم کرنے کیلئے 4 دن کی مہلت

یاد رہےکہ امریکی صدر ڈونلڈ ٹرمپ نے یہ منصوبہ پیش کیا تھاکہ فلسطینیوں کو غزہ سے نکال کر دوسرےممالک بھیجا جائے جس کےبعد غزہ کے ساحل کے ساتھ ‘ریویرا ‘ کی تعمیر کیا جائے۔