پاکستان اور افغانستان جنگ بندی جاری رکھنے پر متفق، مشترکہ اعلامیہ جاری

پاکستان اور افغانستان نے ترکی میں ہونے والے مذاکرات کے دوران جنگ بندی پر اتفاق کرلیا۔

ترکی اور قطر کی ثالثی میں جاری مشترکہ اعلامیے کے مطابق افغانستان، پاکستان، ترکی اور قطر کے نمائندوں نے 25 سے 30 اکتوبر 2025 تک استنبول میں ملاقاتیں کیں جن کا مقصد اس جنگ بندی کو مزید مضبوط بنانا تھا جو 18 اور 19 اکتوبر 2025 کو دوحہ میں طے پائی تھی۔

اعلامیے میں کہا گیا ہے کہ تمام فریقین نے جنگ بندی کے تسلسل پر اتفاق کیا ہے جبکہ عمل درآمد کے طریقۂ کار پر مزید غور اور فیصلہ 6 نومبر 2025 کو استنبول میں ہونے والے اعلیٰ سطح کے اجلاس میں کیا جائے گا۔

اسی طرح تمام فریقین نے ایک مانیٹرنگ اور تصدیقی نظام قائم کرنے پر بھی اتفاق کیا ہے جو امن کے تسلسل کو یقینی بنائے گا اور معاہدے کی خلاف ورزی کرنے والے فریق پر سزا عائد کرے گا۔

مشترکہ اعلامیے کے مطابق ثالثوں کی حیثیت سے ترکی اور قطر نے دونوں ممالک کی فعال شرکت پر اطمینان کا اظہار کیا اور پائیدار امن و استحکام کے لیے تعاون جاری رکھنے کے عزم کا اعادہ کیا گیا ہے۔