پاکستان اور آرمینیا کے درمیان باضابطہ سفارتی تعلقات قائم
نائب وزیراعظم و وزیر خارجہ اسحاق ڈار نے اعلان کیا ہے کہ پاکستان اور آرمینیا نے باضابطہ طور پر سفارتی تعلقات قائم کر لیے ہیں۔
سماجی رابطے کی ویب سائٹ ایکس پر جاری بیان میں اسحاق ڈار نے بتایا کہ چین کے شہر تیانجن میں شنگھائی تعاون تنظیم کے اجلاس کے دوران ان کی آرمینیا کے وزیر خارجہ آرات میر زویان سے ملاقات ہوئی، جہاں دونوں ممالک کے درمیان سفارتی تعلقات کے قیام سے متعلق مشترکہ اعلامیے پر دستخط اور اس کا تبادلہ کیا گیا۔
اس موقع پر دونوں وزرائے خارجہ نے اقوام متحدہ کے چارٹر کے اصولوں اور مقاصد کی پاسداری کے عزم کو دہرایا اور معیشت، تعلیم، ثقافت اور سیاحت سمیت مختلف شعبوں میں تعاون بڑھانے پر اتفاق کیا۔
یاد رہے کہ کچھ روز قبل ہی اسحاق ڈار اور آرمینیا کے وزیر خارجہ کے درمیان ٹیلیفونک گفتگو ہوئی تھی، جس میں سفارتی تعلقات کے قیام اور مستقبل میں تعاون کے فروغ پر ابتدائی مشاورت کی گئی تھی۔ ترجمان دفتر خارجہ کے مطابق اس رابطے میں تعلقات کے قیام اور مختلف شعبوں میں تعاون بڑھانے پر اتفاق کیا گیا تھا۔
