پاکستان شاہینز ٹاپ اینڈ ٹی20سیریز کے سیمی فائنل میں پہنچ گئی
پاکستان شاہینز نے ٹاپ اینڈ ٹی ٹوئنٹی سیریز کے سیمی فائنل میں جگہ بنا لی ہے، نیپال کو سنسنی خیز مقابلے میں صرف ایک رن سے شکست دے کر اگلے مرحلے میں کوالیفائی کیا۔
سیریز کے چھٹے میچ میں پاکستان شاہینز نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 144 رنز بنائے۔ کپتان عرفان خان نے سب سے زیادہ 42 رنز کی اننگز کھیلی، عبدالصمد نے 26 اور وسیم جونیئر نے 23 رنز کا اضافہ کیا۔ نیپال کی جانب سے سومپال کامی نمایاں بولر رہے جنہوں نے 3 وکٹیں حاصل کیں۔
ہدف کے تعاقب میں نیپال کی ٹیم 20 اوورز میں 7 وکٹوں پر 143 رنز بنا سکی۔ آخری اوور میں نیپالی بیٹرز کو جیت کے لیے 8 رنز درکار تھے مگر وہ ہدف حاصل نہ کر سکے۔
بولنگ میں پاکستان شاہینز کے وسیم جونیئر اور فیصل اکرم نے 2، 2 کھلاڑیوں کو آؤٹ کیا جبکہ وکٹ کیپر غازی غوری نے شاندار کارکردگی کا مظاہرہ کرتے ہوئے 2 اسٹمپڈ کیے اور 2 رن آؤٹ میں بھی حصہ ڈالا۔
