پاکستان فلسطین کےلیے اپنی مکمل حمایت جاری رکھے گا : وزیر اعظم شہباز شریف
وزیر اعظم شہباز شریف کا کہنا ہے کہ فلسطینی بہادری سے اسرائیلی جارحیت کا سامنا کررہے ہیں، پاکستان فلسطینی عوام کےلیے اپنی مکمل حمایت جاری رکھے گا۔ پاکستان ہر سفارتی فورم پر فلسطینی عوام کے حقوق کےلیے پوری قوت سے آواز بلند کرے گا۔
وزیراعظم شہباز شریف سے فلسطینی صدر محمود عباس کے مشیر محمود صدیقی الھباش نے ملاقات کی ہے۔ مشیر محمود صدیقی نے فلسطینی صدر کا پیغام پہنچایا اور پاکستان میں حالیہ سیلاب میں جانی نقصانات پر اظہارِ تعزیت کیا۔
مشیر محمود صدیقی الھباش سے ملاقات میں وزیر اعظم شہباز شریف نے فلسطینیوں کےلیے پاکستانی عوام کی غیر متزلزل حمایت کا اعادہ کیا۔
وزیرِ اعظم کا کہنا تھا کہ فلسطینی عوام نے بے پناہ قربانیاں دیں ہیں اور وہ بہادری سے اسرائیلی جارحیت کا سامنا کر رہے ہیں۔
وزیراعظم شہباز شریف نے کہاکہ پاکستان فلسطینی عوام کےلیے اپنی مکمل حمایت جاری رکھے گا، ہر سفارتی فورم پر فلسطینی عوام کے حقوق کےلیے پوری قوت سے آواز بلند کرے گا۔
انہوں نے فلسطین کے صدر ڈاکٹر محمود عباس کےلیے اپنا تہنیتی پیغام بھی دیا۔
ملاقات میں مسجدِ اقصیٰ کے امام احمد حسین، پاکستان میں تعینات فلسطینی سفیر بھی موجود تھے۔
یاد رہے کہ وفد اسلام آباد میں منعقدہ سیرت کانفرنس میں شرکت کررہا ہے۔
