پاکستان2سال میں معاشی بحران سے نکل جائے گا،راناثنااللہ کادعویٰ
وزیراعظم کے مشیر برائے سیاسی امور رانا ثنا اللہ نےدعویٰ کیا ہے کہ اگر دوبارہ کوئی 12 اکتوبر مسلط نہیں ہوا تو پاکستان2سال میں معاشی بحران سے نکل جائے گا۔
راناثنااللہ کا فیصل آباد میں تقریب سے خطاب کرتےہوئے کہنا تھا کہ منیارٹی کارڈ سمیت دیگر پروگرامز کا مقصد آسانی فراہم کرنا ہے، موجودہ مہنگائی میں اس رقم سے سہارا ملے گا اور مہنگائی کی رفتار 38 سے40 فیصد تھی، اسے ہم 3 سے 4 فیصد تک لے آئے ہیں۔
مشیروزیراعظم نے کہا کہ مہنگائی کی رفتار کو حکومت کنٹرول میں رکھتی ہے، مہنگائی کی رفتار کو مزید نیچے لائیں گے، پاکستان کی جب جب خدمت کا موقع ملا بھرپور خدمت کی۔اگر دوبارہ کوئی 12 اکتوبر مسلط نہیں ہوا تو پاکستان دو سال میں معاشی بحران سے نکل جائے گا، وزیراعظم کی قیادت میں وفاقی حکومت اور آرمی چیف جنرل عاصم منیر کی قیادت میں ایس آئی ایف سی بھرپور کوشش کرر ہی ہے۔
رانا ثنا اللہ نے کہا کہ اگر سچی بات کی جائےتو یہ ایک حقیقت ہے کہ ریاست کے تین ستون اپنی اہمیت کھوچکے ہیں، صرف میڈیا کا چوتھا ستون ہی ملک کو آگے لے کر چلے گا، مخالفین کو کارکردگی کےخلاف کوئی نکتہ نہیں ملتا تو سرکاری اشتہارات کو ایشو بنانے کی کوشش کرتے ہیں۔
