پاکستان کا فیٹف گرے لسٹ سے بچنا بڑی کامیابی ہے،وزیردفاع
وزیر دفاع خواجہ آصف نے کہا ہے کہ بھارت اور اسرائیل کی تمام کوششوں کے باوجود پاکستان کو فنانشل ایکشن ٹاسک فورس کی گرے لسٹ میں شامل نہ کرنا ایک بڑی سفارتی فتح ہے۔
خواجہ آصف نے ایکس پرلکھا کہ فیٹف کے ذیلی ادارے ’انٹرنیشنل کوآپریشن ریویو گروپ‘ کے حالیہ اجلاس میں پاکستان کو گرے لسٹ میں شامل نہ کرنے کا فیصلہ کیا گیا۔اجلاس میں چین نے پاکستان کے حق میں واضح اور مضبوط مؤقف اپنایا، جس کی ترکیہ نے بھی مکمل تائید کی، جبکہ جاپان جو ایشیا پیسیفک گروپ کا شریک چیئرمین ہے، اس نے بھی پاکستان کی مکمل حمایت کی۔
وزیر دفاع کا کہنا تھا کہ پاکستان نے فیٹف کی تمام شرائط پوری کردی ہیں، اس لیے اب کسی بھی لسٹ میں اس کی شمولیت کا کوئی جواز باقی نہیں رہا۔
خواجہ آصف نے دعویٰ کیاکہ بھارت کی جانب سے پاکستان کو گرے لسٹ میں شامل کرانے کی کوششیں ناکام ہو گئیں، اور یہ ثابت کرتا ہے کہ پاکستان کی مؤثر سفارت کاری اور بین الاقوامی حمایت نے دشمنوں کی سازشوں کو ناکام بنایا۔
