صدر ٹرمپ کا غزہ منصوبہ امن کےلیے نادر موقع ہے : عاصم افتخار

اقوام متحدہ میں پاکستان کے مندوب عاصم افتخار نے امریکی صدر ٹرمپ کے غزہ منصوبے کو امن کےلیے نادر موقع قرار دیتے ہوئے کہا کہ اس سے غزہ میں نئی سفارتی راہیں کھلیں گی۔ دو ریاستی حل ہی واحد قابل عمل راستہ ہے، اس حل کو کمزور کرنےکی کسی  بھی کوشش کو قبول نہیں کیا جاسکتا۔

اقوام متحدہ میں پاکستان کے مستقل مندوب عاصم افتخار نے مشرق وسطیٰ سے متعلق اجلاس سے خطاب کرتے ہوئےکہا کہ اگرچہ غزہ میں امن کے امکانات تیزی سے معدوم ہوتے دکھائی دے رہے ہیں لیکن اسی دوران نئی سفارتی راہیں بھی کھل رہی ہیں۔پاکستان اس مشاورتی عمل میں فعال طور پر شریک رہے گا۔

عاصم افتخار نے کہا کہ اسرائیل کا ای ون بستی منصوبہ دو ریاستی حل پر براہ راست حملہ ہے،مشرقی یروشلم کو فلسطین سے کاٹنے اور مغربی کنارے کی جغرافیائی وحدت کو ختم کرنےکی یہ کوشش صریحاً بین الاقوامی قانون کی خلاف ورزی ہے۔

مستقل مندوب عاصم افتخار کا کہنا تھاکہ دو ریاستی حل ہی واحد قابلِ عمل راستہ ہے، جو 1967 سے پہلے کی سرحدوں کےمطابق اور مشرقی یروشلم کو فلسطین کا دارالحکومت مانتے ہوئے ممکن ہے۔

انہوں نے واضح کیا کہ اس حل کو کمزور کرنےکی کسی  بھی کوشش کو قبول نہیں کیا جاسکتا۔

انہوں نے مطالبہ کیاکہ سلامتی کونسل اپنی ذمہ داریاں پوری کرے اور فوری طور پر ایسی قرارداد منظور کرےجو اسرائیلی بستیوں کو غیر قانونی قرار دے،ان کی توسیع پر پابندی لگائے اور شہریوں کے تحفظ کو یقینی بنائے۔

پاکستان کے مستقل مندوب عاصم افتخار نے کہا کہ عالمی برادری کو ان خلاف ورزیوں پر خاموش نہیں رہناچاہیے اور تمام رکن ممالک اپنی ذمہ داریاں پوری کریں اور فلسطینی عوام کی حمایت کریں۔

اسرائیلی وزیراعظم سےملاقات کےبعدٹرمپ کاغزہ جنگ بندی منصوبے کااعلان

عاصم افتخار نے کہا کہ ہم فلسطینی عوام کے ساتھ آزادی، انصاف اور وقار کی جدوجہد میں مکمل یکجہتی کا اظہار کرتےہیں اور مشرق وسطیٰ میں ایک جامع اور منصفانہ امن کےلیے آواز بلند کرتے رہیں گے۔