خیبرپختونخوا : دو انتہائی مطلوب دہشت گرد مختلف کارروائیوں میں ہلاک
خیبرپختونخوا کے قبائلی اضلاع میں دو انتہائی مطلوب خارجی دہشت گرد سکیورٹی فورسز کی مختلف کارروائیوں میں ہلاک ہوگئے۔
پولیس حکام کے مطابق جنوبی وزیرستان میں کالعدم تحریک طالبان پاکستان (ٹی ٹی پی) کے ایک کمانڈر کو ہلاک کردیا گیا ہے۔قاری حسین پیر کے روز جنوبی وزیرستان کے علاقے برمل میں فائرنگ کے واقعے میں ہلاک ہوا ۔
پولیس حکام نے اس خارجی دہشت گرد کو ٹی ٹی پی کا ایک اہم رکن قرار دیا،جو سکیورٹی فورسز پر حملوں،بھتہ خوری،اغوا اور ٹارگٹ کلنگ میں ملوث تھا۔
علاوہ ازیں، لکی مروت ضلع کے علاقے وانڈا امیر میں پیر کےروز مقامی پولیس اور مسلح مقامی افراد کے ساتھ جھڑپ میں ایک دہشت گرد ہلاک ہوا ۔
ذرائع کے مطابق علاقے کی پولیس نے مسلح دیہاتیوں اور امن کمیٹی کے ارکان کی مدد سے کارروائی کی،جب انہیں وہاں فتنۃ الخوارج دہشت گردوں کی موجودگی کی اطلاع ملی۔صدر پولیس اسٹیشن کی حدود میں شدید فائرنگ کا تبادلہ ہوا،جس کے نتیجے میں ایک دہشت گرد ہلاک ہوا۔
پولیس حکام نے بتایا کہ ہلاک دہشت گرد کی شناخت حکمت اللہ کے نام سے ہوئی،جو پولیس اور محکمہ انسداد دہشتگردی (سی ٹی ڈی) کو مختلف دہشت گردی کے مقدمات میں مطلوب تھا۔
