پی ٹی آئی نے وزیراعلیٰ گلگت بلتستان سمیت 12 اراکین کی بنیادی رکنیت ختم کر دی

پاکستان تحریک انصاف (پی ٹی آئی) نے وزیراعلیٰ گلگت بلتستان حاجی گلبر خان سمیت 12 اراکین اسمبلی کی بنیادی رکنیت ختم کر دی ہے۔ یہ اقدام پارٹی پالیسی کی سنگین خلاف ورزی، فارورڈ بلاک کی تشکیل، اور پارٹی کے خلاف ووٹنگ جیسے الزامات کی بنیاد پر کیا گیا۔

ایڈیشنل سیکریٹری جنرل پی ٹی آئی کی جانب سے اس فیصلے کا باضابطہ نوٹیفکیشن جاری کر دیا گیا، جبکہ پی ٹی آئی کے سوشل میڈیا پلیٹ فارمز پر بھی ان منحرف اراکین کی تصاویر جاری کر دی گئی ہیں۔

نوٹیفکیشن کے مطابق جن اراکین کی بنیادی رکنیت ختم کی گئی ہے، ان میں وزیراعلیٰ گلگت بلتستان حاجی گلبر خان، شمس الحق لون، راجہ اعظم، عبدالحمید، امجد زیدی، حاجی شاہ بیگ، ثریا زمان، راجہ ناصر مقپون، مشتاق احمد، دلشاد بانو اور فضل رحیم شامل ہیں۔

علاوہ ازیں، پارٹی نے سابق گورنر گلگت بلتستان راجہ جلال حسین مقپون کو شوکاز نوٹس جاری کیا ہے۔

پی ٹی آئی نے واضح ہدایت دی ہے کہ نکالے گئے اراکین پارٹی کا نام، جھنڈا اور کوئی بھی پارٹی عہدہ استعمال نہیں کر سکتے۔