امیر قطر نے پاکستان-سعودی عرب دفاعی معاہدے کو خوش آئند قرار دے دیا
دوحہ میں صدر مملکت آصف علی زرداری کی امیر قطر شیخ تمیم بن حمد الثانی سے ملاقات ہوئی، جس میں بلاول بھٹو زرداری اور پاکستانی سفیر بھی موجود تھے۔ ملاقات میں دونوں رہنماؤں نے تاریخی اور برادرانہ تعلقات کو مزید مضبوط بنانے کے عزم کا اظہار کیا۔
اعلامیے کے مطابق، امیر قطر نے پاکستان اور سعودی عرب کے دفاعی معاہدے کو خوش آئند اور بروقت قرار دیا۔ صدر زرداری نے قطر میں دوحہ مذاکرات کی میزبانی اور افغانستان سے متعلق کردار کو سراہا، جبکہ امیر قطر نے امید ظاہر کی کہ پاکستان افغانستان کے موجودہ مسائل حل کر کے چیلنجز پسِ پشت ڈال دے گا۔
ملاقات میں دفاع، دفاعی پیداوار، زراعت اور غذائی تحفظ میں تعاون بڑھانے پر بھی بات ہوئی، جس پر امیر قطر نے رضامندی ظاہر کی اور متعلقہ حکام کو فوری رابطوں کی ہدایت کی۔
اعلامیے میں بتایا گیا کہ امیر قطر نے پاکستانی کمیونٹی کے کردار کی تعریف کی اور کمیونٹی کی تعداد میں اضافہ کی خواہش کا اظہار کیا۔ انہوں نے کہا کہ پاکستان منفرد حیثیت رکھتا ہے اور قطر پاکستان اور اس کی کامیابیوں پر فخر کرتا ہے۔
صدر زرداری نے امیر قطر کو پاکستان کے دورے کی دعوت دی، جسے امیر قطر نے قبول کیا اور آئندہ سال کے اوائل میں پاکستان کا دورہ کرنے کا اعلان کیا۔
