’’اداکار آغا علی جلد کی خطرناک بیماری میں مبتلا‘‘
اداکار آغا علی نے انکشاف کیا ہے کہ وہ 14 سال سے جلد کی خطرناک بیماری کا شکار ہیں، جس کا دنیا میں کوئی مستقل علاج نہیں ہے، تاہم اس کو وقتی طور پر کنٹرول کیا جا سکتا ہے۔
آغا علی نے حال ہی میں نادر علی کے پوڈکاسٹ میں شرکت کی جہاں انہوں نے اپنی بیماری، کیریئر اور دیگر موضوعات سے متعلق گفتگو کی، بالی ووڈ سے متعلق ایک سوال پر آغا علی نے کہا کہ انہیں بالی ووڈ پسند ہے، لیکن حال میں انہیں شاید نظر لگ گئی ہے، کچھ فلمیں خاص اچھی نہیں آئی۔
فلموں کی آفر سے متعلق بات کرتے ہوئے آغا علی نے کہا کہ فلم نہیں ڈرامے کی آفر آئی تھی، جس کی شوٹنگ دبئی میں ہونی تھی، یہ 4 سال پرانی بات ہے، اس وقت میں کسی اور ڈرامے کی شوٹنگ میں مصروف تھا، اس لیے ان کے ساتھ پروجیکٹ نہیں ہو سکا۔
اداکار نے کہا کہ پاکستان میں 2008 کے بعد سے سنیما دوبارہ بحال نہیں ہوسکے، لوگ کسی فلم کو اداکار یا کاسٹ کی وجہ سے نہیں بلکہ مواد اور کہانی کو دیکھ کر فلم دیکھنے جاتے ہیں، انسان سب سے پہلے فلم کا ٹریلر دیکھتا ہے اگر کہانی اچھی ہوگی تو کاسٹ چاہے کوئی بھی ہو فلم سپر ہٹ جائے گی۔
انہوں نے بالی ووڈ کی مثال دیتے ہوئے کہا کہ سلمان خان کی حال ہی میں فلم ’’کسی کا بھائی کسی کی جان‘‘ فلم فلاپ ہوئی، لیکن آج بھی لوگ کہتے ہیں کہ ’’ٹائیگر 3‘‘ کا انتظار ہے، کیونکہ فلم کی کہانی انہیں متاثر کرتی ہے، کوئی فرق نہیں پڑتا کہ فلم میں کون ہے، جب فلم کی کہانی اچھی ہے تو فلم سپر ہٹ ہوسکتی ہے۔
آغا علی نے بتایا کہ ہمارے ہاں مسئلہ یہ ہے کہ کام کسی اور کا اور اسے کرتا کوئی اور ہے، جس کی وجہ سے ہم خود سے جھوٹ بولتے ہیں، انہیں گزشتہ 14 سالوں سے چنبل (psoriasis) نامی جلد کی بیماری کا سامنا ہے، اس بیماری کو چنبل ادویات کے ذریعے کنٹرول کیا جا سکتا ہے لیکن دنیا میں ابھی تک اس کا مکمل طور پر علاج سامنے نہیں آیا۔
اداکار نے اپنے ہاتھ کی طرف اشارے کرتے ہوئے بتایا کہ چنبل سے ہاتھ، پیروں اور منہ پر سرخ دھبے پڑ جاتے ہیں، یہ دھبے کبھی بہت زیادہ ہو جاتے ہیں اور کبھی کم ہو جاتے ہیں، یہ ایسی بیماری ہے جس کے بارے میں ہم پیش گوئی نہیں کر سکتے۔
انہوں نے بتایا کہ ذہنی تناؤ سے دور رہیں، جلد کو صحت مند رکھنے کے لیے پانی زیادہ پیئیں، نیند پوری کریں، ورزش کریں، اور پریشان نہ ہوں، مجھے انڈسٹری میں 9 سال ہوگئے ہیں اور اس بیماری کے ساتھ رہتے ہوئے 14 سال ہوگئے ہیں، اس بیماری کے ہوتے ہوئے بھی اللہ نے ہمت دی کہ آج سب کے سامنے بیٹھا ہوں۔
خیال رہے کہ چنبل ایک دائمی سوزش، دیرپا اور غیر متعدی جِلدی بیماری ہے، یہ مدافعتی نظام کی خرابی اور جسم کی سوزش پر مشتمل ہوتی ہے، جس میں جلد میں خارش ہونے سے سرخ رنگ کے دھبے پڑ جاتے ہیں جن کو کھجانے سے انتہائی اذیت ناک صورت اختیار کر جاتی ہے۔
