ورلڈ بینک کی پاکستان کے لیے 4 کروڑ 79 لاکھ ڈالر گرانٹ منظور
ورلڈ بینک نے تعلیمی نظام کی بہتری کیلئےپاکستان کے لیے 4 کروڑ 79 لاکھ ڈالر کی گرانٹ کی منظوری دے دی ہے۔
عالمی بینک کے مطابق یہ فنڈنگ گلوبل پارٹنرشپ فار ایجوکیشن فنڈ کے تحت دی جارہی ہے، جس سے 40 لاکھ سے زیادہ بچے مستفید ہوں گے، جن میں پری پرائمری اور پرائمری سطح کے طلبہ شامل ہیں۔
جو پنجاب میں تعلیمی نظام کی بہتری اور اسکول سے باہر بچوں کو دوبارہ تعلیم سے جوڑنے کے لیے مختص کی جائے گی۔
منصوبے کا مقصد بچوں کی ابتدائی تعلیم تک رسائی بڑھانا، اسکول سے باہر بچوں کی واپسی یقینی بنانا اور معذور بچوں کے لیے تعلیمی سہولیات کو مزید بہتر بنانا ہے۔ اس کے ذریعے 80 ہزار اسکول سے باہر بچے اور 1 لاکھ 40 ہزار خصوصی بچے براہ راست فائدہ اٹھائیں گے، جبکہ 30 لاکھ سے زائد سرکاری اسکولوں اور 8.5 لاکھ غیر رسمی اداروں کے طلبہ کو بھی اس میں شامل کیا گیا ہے۔
مزید یہ کہ منصوبے کے تحت 1 لاکھ اساتذہ اور اسکول لیڈرز کو تربیت اور پیشہ ورانہ ترقی کے مواقع فراہم کیے جائیں گے تاکہ تدریسی معیار میں نمایاں بہتری لائی جا سکے۔
ورلڈ بینک کا کہنا ہے کہ یہ منصوبہ پنجاب میں نظامِ تعلیم کی اصلاحات اور صوبے کی پائیدار تعلیمی ترقی کے لیے ایک اہم سنگِ میل ثابت ہوگا، جو حکومتِ پنجاب کے تعلیمی اصلاحاتی ایجنڈے سے مطابقت رکھتا ہے۔
