پاکستان نےعالمی برادری سے غزہ میں جنگ بندی کی اپیل کردی
پاکستان نے اسرائیل کے گریٹر اسرائیل منصوبے کو سختی سے مسترد کرتے ہوئے عالمی برادری سے غزہ میں فوری اور غیر مشروط جنگ بندی کی اپیل کردی ۔
اسلامی تعاون تنظیم (او آئی سی) وزرائے خارجہ کونسل کے ہنگامی اجلاس سے خطاب کرتے ہوئے نائب وزیراعظم و وزیر خارجہ اسحاق ڈار نے کہا کہ اسرائیل کی یہ پالیسی خطے میں امن کے لیے سنگین خطرہ ہے۔
انہوں نے واضح کیا کہ غزہ سے فلسطینیوں کی جبری بے دخلی، اسپتالوں، اسکولوں اور پناہ گزین کیمپوں پر حملے کھلی انسانی حقوق کی خلاف ورزیاں ہیں، جبکہ دو برسوں سے معصوم شہری مسلسل ظلم و بربریت کا نشانہ بن رہے ہیں۔
وزیر خارجہ نے کہا کہ فلسطینیوں پر اجتماعی سزا مسلط کی گئی ہے اور غزہ میں قحط کی کیفیت پیدا ہوچکی ہے، اس لیے عالمی برادری پر لازم ہے کہ وہ اسرائیل کے خلاف مؤثر اور سخت اقدامات کرے، فوری اور مستقل جنگ بندی کو یقینی بنائے اور انسانی امداد کی محفوظ ترسیل کا راستہ ہموار کرے۔
انہوں نے کہا کہ پاکستان ہمیشہ عرب ممالک کی خودمختاری اور سالمیت کی حمایت کرتا ہے اور دو ریاستی حل کو فلسطین مسئلے کا واحد پائیدار راستہ سمجھتا ہے۔ اسحاق ڈار نے اجلاس کے انعقاد میں تعاون پر ترکیہ، ایران اور فلسطین کا خصوصی شکریہ بھی ادا کیا۔
قبل ازیں سعودی وزیر خارجہ شہزادہ فیصل بن فرحان نے اپنے خطاب میں کہا کہ اسرائیل کی غزہ میں مسلسل خلاف ورزیاں دو ریاستی حل کے لیے جاری عالمی کوششوں کو سبوتاژ کررہی ہیں۔ ان کا کہنا تھا کہ فلسطینی ریاست کے باضابطہ قیام کی حمایت میں مزید ممالک شامل ہورہے ہیں۔
