عمران خان نے مریم نوازکیخلاف سی پی او کودرخواست دیدی

پاکستان تحریک انصاف کے بانی عمران خان نے وزیراعلیٰ پنجاب مریم نواز کے خلاف مقدمہ درج کرانے کے لیے سی پی او کو درخواست جمع کرادی ہے۔

عمران خان کے وکیل تابش فاروق کی جانب سے یہ درخواست کوریئر سروس کے ذریعے سی پی او آفس بھیجی گئی، جس میں مؤقف اختیار کیا گیا ہے کہ سابق وزیراعظم کو جیل میں بنیادی سہولیات سے محروم رکھا جا رہا ہے۔

درخواست میں وزیراعلیٰ پنجاب سمیت 8 افراد کو نامزد کیا گیا ہے جن میں سپرنٹنڈنٹ اڈیالہ جیل، اے ایس پی زینب اور ایس ایچ او اعزاز بھی شامل ہیں۔ درخواست کے مطابق عمران خان کو مریم نواز کی ہدایت پر قیدی کے حقوق سے محروم کیا گیا، ان کے سیل میں روشنی تک موجود نہیں اور اہلخانہ کو ملاقات کی اجازت بھی نہیں دی جارہی۔

مزید کہا گیا کہ اڈیالہ جیل پنجاب کی حدود میں آتی ہے اور مریم نواز ماضی میں عمران خان کے خلاف سخت بیانات دے چکی ہیں۔ درخواست میں مؤقف اپنایا گیا کہ اے ایس پی، ایس ایچ او اور دیگر افسران باہم مشورے سے عمران خان کے اہلخانہ کو ہراساں کرتے ہیں، جبکہ بہنوں سے ملاقات نہ کرانے کے ذریعے ہائی کورٹ کے حکم کی بھی خلاف ورزی کی جارہی ہے۔

درخواست میں مطالبہ کیا گیا کہ وزیراعلیٰ مریم نواز سمیت 8 افراد کے خلاف مقدمہ درج کیا جائے۔