لاپتا کارگو طیارے کا ملبہ مل گیا،ارکان کی تلاش جاری

پاک بحریہ اور پاکستان میری ٹائم سیکیورٹی ایجنسی نے مشترکہ سرچ آپریشن کے دوران لاپتا کارگو طیارے کا ملبہ تلاش کر لیا ہے، جبکہ طیارے کے عملے کے ارکان کی تلاش کے لیے آپریشن تاحال جاری ہے۔

حکام کے مطابق طیارے کا ملبہ اوڑمارہ کے ساحل سے 53 ناٹیکل میل جنوب میں سمندر سے ملا ہے۔

ترجمان کے مطابق ملبے کی مزید جانچ اور طیارے کے عملے کے افراد کی تلاش کے لیے ریسکیو اور سرچ آپریشن جاری ہے، جس میں پاک بحریہ اور پاکستان میری ٹائم سیکیورٹی ایجنسی کے بحری اور فضائی وسائل حصہ لے رہے ہیں۔

واضح رہے کہ کے ٹو ایئر ویز کا کارگو طیارہ گزشتہ شب شارجہ سے پاکستان کے لیے روانہ ہوا تھا، تاہم دوران پرواز طیارے سے رابطہ منقطع ہو گیا تھا۔

واقعے کے بعد پاک بحریہ اور دیگر اداروں نے طیارے کی تلاش کے لیے فوری طور پر سرچ آپریشن شروع کیا، جس کے دوران اب طیارے کا ملبہ سمندر سے تلاش کر لیا گیا ہے۔