کترینہ کیف اور وکی کوشل کی محبت کیسے پروان چڑھی؟

اپنے سے پانچ برس بڑی بالی ووڈ بیوٹی کترینہ کیف سے شادی کرنے والے لمبے تڑنگے اور سمارٹ اداکار وکی کوشل معروف ایکشن ڈائریکٹر شیام کوشل کے بیٹے ہیں۔ یہ وہی شیام کوشل ہیں جو فلموں کے خطرناک مناظر کی عکس بندی میں مہارت رکھتے تھے لیکن یہ کیسا عجیب اتفاق تھا کہ وکی کوشل کو والد کے شعبے میں جانے سے زیادہ اعلیٰ تعلیم حاصل کرنے کا جنون تھا۔ یہی وجہ ہے کہ ممبئی کے راجیو گاندھی آف ٹیکنالوجی انسٹی ٹیوٹ سے الیکٹرونکس اور ٹیلی کمیونیکشن کی ڈگری حاصل کرنے کے بعد وہ ایک آئی ٹی کمپنی میں بھی نوکری کرنے لگے لیکن بہت جلد ان کا دل اس ملازمت سے بھر گیا۔

جب انہوں نے اپنے والد شیام کوشل کو بتایا کہ وہ اداکاری کرنا چاہتے ہیں تو ان کا پہلا ردعمل یہ تھا کہ پہلے اداکاری سیکھو۔ چنانچہ وکی نے ایک ایکٹنگ اکیڈمی میں داخلہ لے لیا جہاں اداکاری سکھانے والا انسٹرکٹر انہیں خالی کیمرے کو کترینہ کیف تصور کر کے گانوں پر رقص کرنے کے ساتھ چہرے کے رومانوی تاثرات بنانے بھی سکھاتا تھا۔ ممکن ہے کہ اس وقت وکی کوشل نے کبھی یہ تصور بھی نہیں کیا ہو گا کہ اگلے 12سال میں وہ کترینہ کے شریک سفر بھی بن جائیں گے۔ اداکاری کی باقاعدہ تربیت حاصل کرنے کے بعد جب وکی کسی اچھے موقعے کی تلاش میں تھے، تب بھی ان کے وہم و گمان میں بھی نہ تھا کہ ایک دن وہ سلمان خان کی گرل فرینڈ کا دل چرا لیں گے۔

وکی کو والد کی سفارش پر انوراگ کیشپ نے ’گینگ آف واسع پور‘ میں اسٹنٹ ڈائریکٹر رکھ لیا لیکن وکی کو اداکاری کرنا تھی۔ 2012 میں ’لو شو تے چکن کھرانہ‘ جیسی فلاپ فلم سے یہ خواہش پوری تو ہو گئی لیکن انہیں کوئی مقام نہ مل سکا۔ وہ اگلے دو برس میں ایسی ہی اوسط درجے کی فلموں میں نظر آئے۔ 2015 میں جب وکی کوشل فلم ’بمبے ویلوٹ‘ میں کام کر رہے تھے تو کترینہ کیف کبھی کبھار سیٹ پر آ جاتیں۔ یہ وہ وقت تھا جب فلمی جرائد رنبیر کپور اور کترینہ کیف کی محبت کی داستانیں شائع کر رہے تھے۔

کترینہ کیف سے سیٹ پر ہیلو ہائے تو ہوتی لیکن وکی کوشل نے اس لمحے بھی ممکن ہے سوچا نہ ہو کہ رنبیر کپور جو کترینہ کیف کی زلفوں کے اسیر بنے بیٹھے ہیں، کچھ ایسا ہی حال ان کا بھی ہو گا۔ وکی کوشل کی خوش قسمتی ہی ہے کہ اسی سال ان کی فلم ’مسان‘ نے انہیں بطور اداکار وہ پہچان کرا دی، جس کی انہیں آرزو تھی۔ پھر 2018 میں سنجے دت کی زندگی پر بننے والی فلم ’سنجو‘ نے تو جیسے وکی کوشل کی قسمت ہی پلٹ کر رکھ دی۔ دلچسپ بات یہ ہے کہ اس فلم میں بھی وکی کوشل کے ساتھ رنبیر کپور تھے، جو اس وقت تک کترینہ کیف کے ’سابق بوائے فرینڈ‘ بن چکے تھے اور بالی وڈ میں قیاس آرائیاں کی جا رہی تھیں کہ کترینہ کیف اور سلمان خان کی پھر سے دوستی ہوگئی ہے۔

وکی کا فلمی سفر اب تیزی کے ساتھ آگے بڑھ رہا تھا۔ بالخصوص فلم ’رازی‘ نے انہیں بھی کامیاب اداکاروں کی صف میں لا کھڑا کیا تھا۔ ایسے میں جب بالی وڈ میں پریانکا چوپڑہ اور نک جونز اور پھر دپیکا پدوکون اور رنویر سنگھ نے بیاہ رچایا تو 2019 کی ایک ایوارڈ تقریب، جس میں سلمان خان بھی موجود تھے، وکی کوشل نے بھری محفل میں کترینہ کیف کو سٹیج پر مدعو کرکے ازراہ مذاق پوچھا، ’آپ کسی اچھے سے وکی کوشل کو ڈھونڈ کر شادی کیوں نہیں کر لیتیں، آج کل ویسے ہی شادیوں کا سیزن چل رہا ہے؟‘

کترینہ کیف سوال دوبارہ پوچھا تو بیک گراؤنڈ میں ان کی ہی فلم کا گیت ’مجھ سے شادی کرو گی‘ بج اٹھا۔‘ اس موقعے پر مہمانوں میں بیٹھے سلمان خان کے تاثرات دیکھنے سے تعلق رکھتے تھے۔ انہوں نے غصے کے عالم میں اپنا سر ساتھ بیٹھے شخص کے کندھے پر پھینک دیا۔ ظاہری بات ہے کہ یہ سیگمنٹ ایوارڈ تقریب کا طے شدہ حصہ تھا۔ عین ممکن ہے اس وقت وکی کے ذہن کے گوشے میں کہیں بھی یہ نہیں تھا کہ وہ کترینہ کیف کو دل دے بیٹھیں گے، اسی عرصے میں وکی کوشل نے ویب چینل کے لیے کترینہ کیف کا انٹرویو بھی لیا، جس کے دوران ممکن ہے کہ دونوں کو ایک دوسرے کو سمجھنے کا موقع ملا۔ دوسری جانب کرن جوہر کے ’کافی ود کرن‘ میں کترینہ کیف نے خواہش ظاہر کی کہ وہ وکی کوشل کے ساتھ فلموں میں کام کرنا چاہتی ہیں۔

پھر حالات بدلنے لگے۔ وکی کوشل اور کترینہ کیف کی ملاقاتیں بڑھنے لگیں اور پھر ہنسی مذاق میں کہی ہوئیں باتیں حقیقت کا روپ دھارنے لگیں۔ کب دونوں ایک دوسرے کے قریب آئے، کب ایک دوسرے کے لیے دل دھڑکنے لگے یہ معلوم نہ ہوسکا۔ یہ ضرور ہے کہ دونوں کو ہر تقریب میں بس ساتھ ساتھ دیکھا جاتا۔ سلمان خان اور رنبیر کپور کے بعد اب کترینہ کیف کی زندگی میں وکی کوشل داخل ہو چکے تھے۔

ذرائع ابلاغ جب دونوں سے اس رشتے کے متعلق دریافت کرتے تو جواب کترینہ کیف دیتیں نہ وکی کوشل۔ یہاں تک بات پھر شادی تک پہنچ گئی۔ گو کترینہ کیف وکی کوشل سے لگ بھگ پانچ سال بڑی ہیں لیکن عشق کی آگ نے عمروں کا یہ فرق بھی مٹا دیا، دونوں اب ایک نئے رشتے اور تعلق سے جڑ گئے ہیں۔
یہ بھی پڑھیں: مذاکرات میں ڈیڈ لاک: طالبان کا حملے دوبارہ شروع کرنے کا اعلان
اب کم از کم اتنی آسانی ضرور ہو گئی ہے کہ اس کے بعد وکی کوشل کو اب کیمرے کو کترینہ کیف سمجھ کر رقص نہیں کرنا پڑے گا۔ پھر سب سے بڑھ کر یہ وہ کسی ایوارڈ تقریب میں کترینہ کیف سے یہ سوال بھی نہیں کر پائیں گے کہ کوئی اچھا سا وکی کوشل ڈھونڈ کر شادی کیوں نہیں کر لیتیں۔ اور کوئی بعید نہیں کہ کترینہ کیف کی وکی کوشل کے ساتھ کام کرنے کی خواہش بھی اب پوری ہو جائے۔