تبت میں 7.1 شدت کا شدید زلزلہ :53 افراد ہلاک ، متعدد زخمی
فرانسیسی خبر رساں ادارے ’اے ایف پی‘ کےمطابق پڑوسی ملک نیپال کے دارالحکومت کھٹمنڈو اور بھارت کےکچھ حصوں میں بھی زلزلےکےجھٹکے محسوس کیے گئے۔
چین کےدور افتادہ علاقے تبت میں منگل کی صبح 7.1 شدت کے زلزلے کےنتیجےمیں کم از کم 53 افراد ہلاک اور 38 زخمی ہوگئے،جب کہ متعدد عمارتیں منہدم ہوگئیں۔
چین کےسرکاری نشریاتی ادارے سی سی ٹی وی کی جانب سے جاری کی گئی ویڈیوز میں دیکھا جا سکتا ہے کہ زلزلے کے بعد تباہ شدہ مکانات کی دیواریں ٹوٹی ہوئی ہیں اورملبہ کھنڈرات میں بکھرا پڑا ہے۔
امریکی جیولوجیکل سروے کےمطابق زلزلے کی شدت 7.1 ریکارڈ کی گئی۔
چین کےزلزلہ نیٹ ورک سینٹر (سی ای این سی) کے مطابق زلزلےکی شدت 6.8 ریکارڈ کی گئی جس کی شدت نیپال کی سرحد کے قریب مقامی وقت کےمطابق صبح 9 بج کر 5 منٹ پر محسوس کی گئی۔
چینی خبررساں ادارے ’شنہوا‘ نے علاقائی ڈیزاسٹر ریلیف ہیڈکوارٹرز کا حوالہ دیتے ہوئے کہا کہ منگل کی صبح 9 بج کر 5 منٹ پرتبت کےخود مختار علاقے ژیزانگ کے شہر ژیگازے میں 6.8 شدت کے زلزلے کے جھٹکے محسوس کیے گئے، جس کےنتیجے میں 53 افراد کی موت اور 38 کے زخمی ہونے کی تصدیق ہوئی ہے۔
’شنہوا‘ کےمطابق مقامی حکام زلزلے کے اثرات کا جائزہ لینے کے لئےکاؤنٹی کے مختلف ٹاؤن شپس سے رابطہ کر رہے ہیں۔
امریکا کی30 ریاستوں میں شدید برفباری،نظام زندگی مفلوج
چین کےمحکمہ موسمیات کے مطابق ڈنگری میں درجہ حرارت منفی 8 ڈگری سینٹی گریڈ (17.6 ڈگری فارن ہائیٹ) کے آس پاس ہےاور شام منفی 18 تک گر جائے گا۔
تبت کےعلاقےمیں سب سے اونچی کاؤنٹی تقریباً 62،000 افراد کا گھر ہے اورماؤنٹ ایورسٹ کے چینی حصے میں واقع ہے۔
سی ای این سی نےکہا کہ اگرچہ اس خطےمیں زلزلے عام ہیں، لیکن منگل کو آنے والا زلزلہ گزشتہ 5 سال میں 200 کلومیٹر کے دائرےمیں ریکارڈ کیا جانے والا سب سے طاقتور زلزلہ تھا۔
کھٹمنڈو کے علاوہ نیپال میں ایورسٹ کے قریب بلند و بالا پہاڑوں میں لوبوچےکےآس پاس کے علاقے بھی زلزلے اور آفٹر شاکس سے لرز اٹھے۔
نیپال کےعلاقے نامچے سے تعلق رکھنے والے سرکاری عہدیدار جگت پرساد بھوسل نے خبر رساں ادارے ’اے ایف پی‘ کو بتایا کہ زلزلےکی شدت بہت زیادہ تھی، سب کچھ ہل کر رہ گیا، ہر کوئی الرٹ ہے،لیکن ہمیں ابھی تک کسی نقصان کے بارے میں معلوم نہیں ہے۔
چینی میڈیا کےمطابق زلزلے کے جھٹکے بھارت، بھوٹان اور بنگلہ دیش میں بھی محسوس کیے گئے۔
نیپال کےسولوخمبو ضلع کے چیف ڈسٹرکٹ آفیسر انوج راج گھمیرے نےکہا کہ ہم نے بہت طاقتور زلزلہ محسوس کیا، ابھی تک ہمیں کسی کےزخمی ہونے یا جسمانی نقصان کی کوئی اطلاع نہیں ملی ہے۔
ہم نے پولیس اوردیگر سکیورٹی فورسز کے ساتھ ساتھ مقامی لوگوں کو بھی نقصان کےبارے میں معلومات جمع کرنے کے لیے متحرک کیا ہے۔
سرکاری نشریاتی ادارے سی سی ٹی وی کی رپورٹ کے مطابق زلزلے کےمرکز سے 5 کلومیٹر کے اندر چند آبادیاں موجود ہیں، جو تبت کےدارالحکومت سے 380 کلومیٹر دور ہے۔
نومبر 2023 میں شمال مغربی نیپال میں 5.6 شدت کے زلزلے میں کم ازکم 138 افراد ہلاک اور درجنوں زخمی ہو گئے تھے۔
2015 میں نیپال میں 7.8 شدت کے زلزلے میں کھٹمنڈو کو شدید نقصان پہنچا تھا،اس دوران 9 ہزار افراد ہلاک اور ہزاروں زخمی ہوئےتھے۔
2008 میں جنوبی چین کےسچوان صوبے میں زلزلے کے نتیجےمیں کم از کم 70 ہزار افراد ہلاک ہوئے تھے۔
