بلومبرگ نے پاکستان کو دوسری ابھرتی ہوئی معیشت قرار دیا

عالمی مالیاتی ادارے بلومبرگ نے اپنی تازہ رپورٹ میں پاکستان کو دنیا کی دوسری تیزی سے ابھرتی ہوئی معیشت قرار دیا ہے۔
بلومبرگ کے جاری کردہ اعداد و شمار کے مطابق پاکستان ڈیفالٹ رسک میں کمی کے لحاظ سے دنیا میں دوسرے نمبر پر ہے۔ جون 2024 سے ستمبر 2025 تک پاکستان نے وہ معاشی کارکردگی دکھائی جو کئی بڑی ابھرتی معیشتیں حاصل نہ کر سکیں۔
اعداد و شمار کے مطابق پاکستان کے دیوالیہ ہونے کے خطرات میں 2200 بیسس پوائنٹس کی نمایاں کمی ریکارڈ کی گئی۔ رپورٹ میں کہا گیا ہے کہ پاکستان واحد ابھرتی ہوئی معیشت ہے جس نے چار سہ ماہیوں کے دوران مسلسل اپنی مالی ساکھ میں بہتری دکھائی۔
عالمی درجہ بندی میں پاکستان، ترکی کے بعد دوسرا ملک ہے جس نے نمایاں مالی استحکام حاصل کیا۔ بلومبرگ کے مطابق مالیاتی نظم و ضبط، ساختی اصلاحات، قرضوں کی بروقت ادائیگی، اور آئی ایم ایف پروگرام پر عمل درآمد نے پاکستانی معیشت کو مضبوط کیا ہے۔
حکومتی پالیسیوں نے نہ صرف مہنگائی میں کمی اور روپے کے استحکام میں کردار ادا کیا بلکہ بیرونی خسارے کو بھی محدود کیا۔ بین الاقوامی کریڈٹ ریٹنگ ایجنسیز فچ، ایس اینڈ پی، اور موڈیز نے بھی پاکستان کے حوالے سے مثبت آؤٹ لک برقرار رکھا ہے۔
بلومبرگ رپورٹ کے مطابق یہ پیش رفت اس بات کا ثبوت ہے کہ پاکستان پالیسی کے تسلسل اور مالی شفافیت کے ذریعے عالمی منڈیوں میں اپنی ساکھ بحال کر رہا ہے اور اب سرمایہ کاروں کے لیے ایک محفوظ، پُرکشش اور منافع بخش منزل بن چکا ہے۔
دوسری جانب وزیراعظم شہباز شریف کا کہنا ہے کہ نے پاکستانی معیشت کے حوالے سے بلومبرگ کی رپورٹ کو اہم سنگ میل قرار دیتے ہوئے کہا کہ ترقی کا یہ سفر اب رکے گا نہیں۔
پاکستانی معیشت کے حوالے سے بلوم برگ کی حالیہ مثبت رپورٹ کا خیر مقدم کرتے ہوئے وزیراعظم شہبازشریف نے کہا کہ عالمی جریدے کی رپورٹ کے مطابق پاکستان کے کریڈٹ ڈیفالٹ سواپ میں مضمر ڈیفالٹ امکانات میں 2200 بیسز پوائنٹس کی کمی ہوئی۔
انہوں نے کہا کہ پاکستان کے سی ڈی ایس کی قیمت میں نمایاں کمی واقع ہوئی ہے، یہ اس بات کا عکاس ہے کہ پاکستانی معیشت میں عالمی سرمایہ کاروں کے اعتماد میں اضافہ ہو رہا ہے۔