چینی ٹیکنالوجی قدرتی آفات سے نمٹنے میں پاکستان کے لیے مددگار ہوگی، وزیراعظم
وزیرِاعظم شہباز شریف نے کہا ہے کہ پاکستان میں حالیہ سیلابی صورتحال سے نمٹنے کے لیے قومی سطح پر بھرپور اقدامات جاری ہیں، اور اس سلسلے میں چین کی جدید ٹیکنالوجی اور تجربہ پاکستان کے لیے انتہائی معاون ثابت ہو سکتا ہے۔
ان خیالات کا اظہار انہوں نے چین کے شہر تیانجن میں نیشنل فیسلٹی فار ارتھ کوئیک انجینئرنگ سمیولیشن کے دورے کے دوران کیا۔
وزیراعظم نے قدرتی آفات سے نمٹنے کے چینی طریقہ کار کو سراہا اور کہا کہ پاکستان کو چینی مہارت اور ٹیکنالوجی سے فائدہ اٹھاتے ہوئے مستقبل میں مؤثر حفاظتی اقدامات اور حکمتِ عملی بنانے کی ضرورت ہے۔
وزیراعظم نے اس موقع پر ہدایت دی کہ پاکستان میں پاک-چین جوائنٹ لیب، انٹرنیشنل میڈیکل کوآپریشن سینٹر جیسے منصوبوں کو مزید فعال بنایا جائے، اور ان شعبوں میں دوطرفہ شراکت داری کو وسعت دی جائے تاکہ قدرتی آفات سے نمٹنے کی صلاحیت کو بہتر بنایا جا سکے۔
وزیراعظم نے کہا کہ حکومت کی جانب سے سیلاب متاثرہ اضلاع نارووال، سیالکوٹ، وزیرآباد، حافظ آباد، چنیوٹ اور جھنگ میں متاثرہ خاندانوں کے لیے اضافی امدادی سامان کے قافلے روانہ کر دیے گئے ہیں، جو کہ صوبائی ڈیزاسٹر مینجمنٹ اتھارٹی (PDMA) کے حوالے کیے جائیں گے۔
انہوں نے نیشنل ڈیزاسٹر مینجمنٹ اتھارٹی (NDMA) کو ہدایت دی کہ وہ پنجاب حکومت سے قریبی رابطے میں رہے اور صوبائی اداروں کو مکمل تعاون فراہم کرے۔
وزیراعظم نے اس عزم کا اعادہ کیا کہ متاثرہ خاندانوں کی امداد اور بحالی کی سرگرمیاں بلا تعطل جاری رکھی جائیں گی۔
چینی سائنسدانوں سے بریفنگ، جدید ریسکیو ٹیکنالوجی پر تبادلہ خیال
دورے کے دوران وزیراعظم کو ڈیزاسٹر مینجمنٹ، زلزلہ سمیولیشن، اور ریسکیو ٹیکنالوجیز کے حوالے سے بریفنگ دی گئی۔ انہیں نئی میڈیکل ریسکیو گاڑیوں سمیت مختلف جدید آلات کا معائنہ بھی کروایا گیا۔
وزیراعظم کو آگاہ کیا گیا کہ چین اور پاکستان کے درمیان بیلٹ اینڈ روڈ انیشی ایٹو کے تحت مختلف منصوبے مکمل کیے جا چکے ہیں، جن میں پاک-چین جوائنٹ لیب برائے ڈیزاسٹر اینڈ ایمرجنسی میڈیسن ، انٹرنیشنل میڈیکل کوآپریشن سینٹر ، پاک-چین فرینڈشپ ہسپتال ، شامل ہیں، جبکہ کئی دیگر منصوبوں پر کام جاری ہے۔
وزیراعظم شہباز شریف کی آج ترک صدر رجب طیب اردوان سے اہم ملاقات متوقع ہے۔ اس کے علاوہ وہ تیانجن میں شنگھائی تعاون تنظیم (SCO) کے سربراہی اجلاس کے استقبالیہ میں بھی شرکت کریں گے۔
