بگن لوئر کرم میں کرفیو نافذ،سرچ آپریشن، لوگوں کی نقل مکانی شروع
خیبر پختونخوا کے ضلع کرم کے علاقے بگن لوئر کرم میں فورسز نے کرفیو نافذ کرکے سرچ آپریشن کا آغاز کردیا۔لوگوں نے علاقے سےنقل مکانی شروع کردی۔
پولیس نےبتایا کہ فورسز بگن کےعلاقے میں داخل ہوگئی ہیں اور سرچ آپریشن کیا جا رہا ہے۔بگن میں کرفیو نافذ کردیا گیا ہے۔آپریشن کے بعد بگن و ملحقہ علاقوں کے متاثرین نے نقل مکانی شروع کردی ہے۔
قبل ازیں کرم کی صورتحال پر اعلیٰ سطح کا اجلاس ہواجس میں ترجمان حکومت خیبرپختونخوا، چیف سیکریٹری خیبرپختونخوا، آئی جی پولیس کے علاوہ دیگر سول و پولیس افسران شریک ہوئے۔
ترجمان صوبائی حکومت خیبرپختونخوا کی جانب سے جاری بیان کے مطابق شرپسند عناصر کے خلاف بلا تفریق سخت کارروائی کرنے کا فیصلہ کرلیا گیا ہے، ریاست پر امن عناصر کیساتھ کھڑی ہےاورظالم عناصر کو کیفرکردار تک پہنچایا جائے گا، متاثرہ علاقوں میں موجود چند شرپسندوں کیخلاف کارروائی ناگزیر ہو چکی ہے۔
امن معاہدےپرقانون اورپشتون روایات کےمطابق عملدرآمد کرایا جائے گا، شرپسندوں کیخلاف کاروائی میں پولیس اور سول انتظامیہ کی مدد کیلئےسکیورٹی فورسزسپورٹ میں موجود ہوں گی، حکومت کو خدشہ ہےکہ امن پسند لوگوں کے درمیان کچھ شرپسند گھس گئےہیں۔
امن پسند لوگوں کو نقصان سےبچانےکیلئےانہیں شرپسندوں سےالگ کرکےکارروائی کی جائے گی، متاثرہ علاقوں کےعوام کیلئےرہائش کےبہترین متبادل انتظامات کیے گئے ہیں، حکومت دونوں فریقین سے درخواست کرتی ہےکہ اپنےدرمیان موجود شرپسندوں کی نشاندہی میں قانون نافذ کرنے والے اداروں کی مدد کریں۔
بیان کے مطابق خیبر پختونخوا حکومت گزشتہ تین مہینوں سے کرم میں پرامن طریقے سے امن بحال کرنے کی کوشش کر رہی ہے، گرینڈ جرگے کے ذریعے پشتون روایات کے مطابق امن معاہدہ کیا گیا، کرم میں چند شرپسند عناصر نے امن معاہدے کو سبوتاژ کرنے کی مذموم کوشش کی، شرپسندوں نے ڈپٹی کمشنر پر قاتلانہ حملہ کیا، جس میں وہ شدید زخمی ہو گئے۔
