امریکا اور بھارت کے درمیان دفاعی معاہدے پر دستخط
امریکا اور بھارت نے 10 سالہ دفاعی معاہدے پر دستخط کردیے ہیں، جس کا مقصد عسکری تعاون کو فروغ دینا اور بحرالہند و بحرالکاہل (انڈو پیسیفک) خطے میں علاقائی سلامتی کو مضبوط کرنا ہے۔
امریکی وزیر دفاع پیٹ ہیگستھ اور بھارتی وزیر دفاع راج ناتھ سنگھ نے ملائیشیا کے دارالحکومت کوالالمپور میں مشترکہ پریس کانفرنس کے دوران اس معاہدے کا اعلان کیا۔
وزیر دفاع پیٹ ہیگستھ نے کہا کہ یہ معاہدہ خطے میں استحکام اور دفاعی توازن کےلیے سنگِ میل کی حیثیت رکھتا ہے۔پیٹ ہیگسیتھ کے مطابق معاہدے سے دونوں ممالک کےدرمیان تعاون، معلومات کے تبادلے اور ٹیکنالوجی کے اشتراک میں اضافہ ہو گا۔
پیٹ ہیگستھ نے کہاکہ یہ دونوں ممالک کی افواج کے درمیان تعاون کو مزید مضبوط بنانےکی سمت میں ایک اہم قدم ہے،جو مستقبل میں زیادہ گہرےاور مؤثر دفاعی تعلقات کی راہ ہموار کرےگا‘۔
امریکا اور بھارت کے وزراء دفاع کی ملاقات آسیان ڈیفنس سمٹ کے دوران ہوئی، یہ ملاقات ایک ایسے وقت میں ہوئی جب امریکا نے اگست میں بھارت کی روسی تیل کی خریداری پر ناراضی کا اظہار کیا تھا اور بھارتی مصنوعات پر 50 فیصد ٹیکس عائد کیا تھا، جس کے بعد بھارت نے امریکی دفاعی سازوسامان کی خریداری کا عمل عارضی طور پر روک دیا تھا،تاہم دونوں ممالک کے درمیان آج ہونےوالی ملاقات میں دفاعی خریداری کے منصوبوں پر نظر ثانی کےحوالے سے بھی بات چیت کی گئی۔
