وزیردفاع نے دوبارہ بھارتی جارحیت کاخدشہ ظاہرکردیا
وزیر دفاع خواجہ آصف نے ایک بارپھر بھارتی جارحیت کے خدشے سےآگاہ کردیا۔
خواجہ آصف کا نجی ٹی وی سے گفتگو میں کہنا تھا کہ بھارت کی جانب سے دوبارہ جارحیت کا امکان موجود ہے، اگر ایسا ہوا تو پاکستان بھی بھرپور جواب دے گا۔مودی ایک کونے میں لگا ہوا ہے اور اس کا سیاسی سرمایہ ختم ہوگیا ہے تو ایسی صورتحال میں بوکھلاہٹ میں مودی کوئی حرکت کرسکتا ہے، ایسا ہوا تو پاکستان بھی بھرپور جواب دے گا اور اس کے عالمی اثرات بھی ہوں گے۔
وزیر دفاع خواجہ آصف کا کہنا تھا کہ مودی نے کوئی جارحانہ قدم اٹھایا تو ساری دنیا ایک کیمپ میں اکٹھی ہوجائےگی اور بھارت کے دوستوں کی جانب سے بھی مودی کو حمایت نہیں ملے گی۔
خواجہ آصف نے مزید کہا کہ سیز فائر کے لیے ہمارے اوپرکوئی دباؤ نہیں تھا، امریکا سمیت تمام دوست ممالک ہمارے ساتھ آن بورڈ تھے، دوست ممالک سیز فائر کے حق میں تھے اس لیے ہم نے سیز فائر کی۔ہم نے چار دن انتظار کیا کہ شاید آج بھارت کو بات سمجھ آئے، بھارت کے خلاف ہماری جیت کثیر الجہتی ہے، یہ پہلی لڑائی تھی جس میں سائبر وار فیئر ہوا ہے، سائبر وار میں بھارت کا سارا سسٹم مفلوج ہوگیا تھا۔
وزیر دفاع نے کہا کہ کل تک جو پاکستان کو سیریس نہیں لے رہے تھے وہ آج احترام کی نگاہ سے دیکھ رہے ہیں، ہم نے بھارت کے 5 طیارے گرائے ہیں اور ایک یو اے وی گرایا ہے۔آدھے یا پورے، بھارت کشمیر پر بات کرنے پر آمادہ تو ہوا ہے، ورنہ بھارت مسئلہ کشمیر پر بات کرنے کو تیار ہی نہیں تھا، یہ پاکستان کی کامیابی ہے۔
