کیا جنرل فیض نے واقعی عامر لیاقت کی سفارش کی؟

تحریک انصاف کے رنگیلے رکن اسمبلی اور معروف اینکر پرسن ڈاکٹر عامر لیاقت حسین(Dr Amir Liaquat) نے سابق آئی ایس آئی چیف جنرل فیض حمید سے اپنی سفارش کروانے کا دعویٰ کرنے پر سابق چیئرمین پیمرا ابصار عالم کیخلاف ہتک عزت کا دعویٰ دائر کرنے کا اعلان کیا ہے۔ ان کا کہنا ہے کہ ان کی جنرل فیض سے صرف ایک مرتبہ بات ہوئی جب عدالت ان کاکیس سن رہی تھی لہذا میں چیئرمین پیمرا ابصار عالم سے سفارش کیوں کرواتا؟
خیال رہے کہ گزشتہ دنوں عاصمہ جہانگیر کانفرنس کے دوران اپنے خطاب میں سابق چیئرمین پیمرا ابصار عالم نے دعویٰ کیا تھا کہ جنرل فیض حمید نے مجھے کال کرکے کہا کہ میں آپ سے ملنا چاہتا ہوں جس پر میں نے ان سے ملاقات کی حامی بھرلی اور دفتر والوں سے کہا کہ جنرل فیض کے ساتھ کوئی قومی سلامتی کے ایشوز ڈسکس ہونا ہوں گے، دیکھتے ہیں اس سلسلے میں پیمرا کو کیا کردار سونپا جاتا ہے۔ ابصار عالم کا کہنا تھا کہ ہم جنرل فیض حمید کے سامنے پوری تیاری کیساتھ بیٹھے تو سب سے بڑا ایشو جو انہوں نے ڈسکس کیا وہ یہ تھا کہ ایک ٹی وی چینل پر پروگرام کرنے والے ڈاکٹر عامر لیاقت حسین کو پیمرا کچھ نہ کہے۔ ابصار عالم کے بقول میں نے جنرل فیض کو صاف انکار کردیا کہ یہ کسی صورت نہیں ہو سکتا، عامر لیاقت(Dr Amir Liaquat) اور ان کے ادارے کے ساتھ قانون کے مطابق سلوک ہوگا۔ یاد رہے کہ عامر لیاقت پر نفرت انگیز مواد پھیلانے کے الزام پر کارروائی ہو رہی تھی۔
ابصار عالم کے خطاب اور جنرل فیض حمید سے اپنی سفارش کروانے کے دعوے کے ردعمل میں عامر لیاقت کا کہنا ہے کہ بطور چیئرمین پیمرا ابصار عالم کا نشانہ صرف ایک نجی ٹی وی تھا جہاں میں پروگرام کرتا تھا۔
یاد رہے کہ وہ بول ٹی وی کی بات کر رہے ہیں جسے کہ ایجنسیوں کا چینل قرار دیا جاتا ہے۔ اسلام آباد میں پریس کانفرنس کرتے ہوئے ان کا کہنا تھا کہ کسی کے اقتدار سے جانے کے بعد اس کے خلاف بولنا کوئی بڑی بات نہیں ہے۔ میں نے سیاست میں آکر دیکھا کس طرح راتوں رات وفاداریاں تبدیل ہوتی ہیں۔ انہوں نے کہا کہ جھوٹے الزام لگانے والے ابصار کی مذمت کرتا ہوں۔ میں ان کے خلاف ہتک عزت کا دعویٰ دائر کروں گا۔ پی ٹی آئی کے رکن قومی اسمبلی کا کہنا تھا کہ میں نے اپنے خلاف کیسز کا سپریم کورٹ میں سامنا کیا اور باعزت بری ہوا، ابصار عالم غلط دعوے نہ کریں، جب فیصلے عدالت کررہی ہے تو ابصار عالم کون ہیں کہ جنرل فیض ان سے میری سفارش کرتے، عامر لیاقت کا کہنا تھا کہ سابق آئی ایس آئی چیف جنرل فیض نے اپنے بہنوئی کے انتقال پر مجھ سے دعا کی درخواست کی تھی اس کے علاوہ میں انہیں بالکل نہیں جانتا۔
لاہور میں سکول دوبارہ بند کرنے کا اعلان