گلوبل صمود فلوٹیلا : تمام پاکستانیوں کی رہائی کےلیے کوششیں کررہے ہیں، اسحاق ڈار

وزیر خارجہ اسحاق ڈار نے گلوبل صمود فلوٹیلا پر اسرائیلی حملے کی مذمت کرتے ہوئے کہا کہ ہم سابق سینیٹر مشتاق احمد سمیت تمام پاکستانیوں کی رہائی کےلیے ایک بااثر یورپی ملک سے رابطے میں ہیں۔

قومی اسمبلی میں اظہار خیال کرتے ہوئے وزیر خارجہ اسحاق ڈار نے کہا کہ ہماری اطلاع کے مطابق سابق سینیٹر مشتاق احمد کو اسرائیلی فورسز نے گرفتار کیا ہے، ہماری پوری کوشش ہے جتنے بھی پاکستانی ہیں ان کو بحفاظت واپس لائیں۔

نائب وزیر اعظم اسحٰق ڈار نے کہا کہ وزیر اعظم شہباز شریف نے اقوام متحدہ کی جنرل اسمبلی اجلاس میں قوم کی بھرپور نمائندگی کی،کشمیر کے ساتھ فلسطین کا مسئلہ اٹھایا، عالمی معاملات پر گفتگو کی اور موسمیاتی تبدیلی کا مسئلہ اٹھایا، وہاں اسرائیل کا نام لےکر اس کی مذمت کی گئی،۔

وزیر خارجہ نے کہاکہ جنرل اسمبلی جانے سےپہلے ہماری بات ہوئی کہ اقوام متحدہ کا اجلاس تو ہرسال ہوتا ہے،اس بار 80 واں ہو رہا ہےلیکن اقوام متحدہ غزہ میں خونریزی رکوانے میں ناکام ہو چکا ہے، یورپی یونین ناکام ہو چکی ہے،عرب ممالک ناکام ہو چکے ہیں، ہماری کوشش تھی کہ کچھ ممالک کے ساتھ مل کر امریکا، جو آخری امید ہے اسے انگیج کیا جائے اور معصوم جانوں کی روز ہونےوالی خونریزی، بھوک سے اموات اور بےدخلی اور مغربی کنارے کو ہڑپ کرنے کے منصوبے کو روکا جائے۔

انہوں نے کہا کہ اس صورت حال میں ایک منصوبہ تھاکہ کچھ ممالک مل کر امریکی صدر سے رابطہ کریں اور انہیں اس میں شامل کریں کہ اس وقت سب سے زیادہ تکلیف دہ مسئلہ ہے،جہاں 64 ہزار افراد شہید اور ڈیڑھ لاکھ سے زائد زخمی ہو چکے ہیں، اقوام متحدہ میں درجنوں قرار دادیں منظور ہو چکی ہیں،او آئی سی کی قرار دادیں منظور ہو چکی ہیں۔میں نے اقوام متحدہ میں اپنی تقریر میں کہاکہ غزہ انسانوں کے قبرستان کے ساتھ ساتھ عالمی ضمیر کا قبرستان بھی بن چکا ہے۔

اسحٰق ڈار نے کہا کہ 5 عرب ممالک، پاکستان، ترکیہ اور انڈونیشیا کے صدور اور وزرائے اعظم نے اپنےوزرائے خارجہ کے ہمراہ امریکی صدر سے ملاقات کی ۔