ہنگو : ایف سی قلعے پر حملہ، 3 اہلکار شہید، جوابی کارروائی میں 5 خوارج ہلاک
ہنگو کی تحصیل ٹل کے علاقے دو آبہ میں فیڈرل کانسٹیبلری (ایف سی) کے قلعے پر فتنۃ الخوارج کے حملے میں فیڈرل ریزرو پولیس کے 3 جوان شہید ہوگئے،جوابی کارروائی میں 5 خوارج ہلاک ہوگئے۔
ڈی پی او کےمطابق فتنۃ الخوارج کے دہشت گردوں نے ایف سی قلعہ کو نشانہ بنایا،واقعے میں فیڈرل ریزرو پولیس کے 3 جوان شہید ہوگئے۔
ڈی پی او نے بتایا کہ خارجیوں کے خلاف بھرپور جوابی کارروائی میں سہولت کار سمیت 5 خارجی ہلاک ہوگئے،سہولت کار دہشت گردوں کے ساتھ ملا ہوا تھا، انہوں نے بتایا کہ پولیس اور ایف سی کی بھرپور جوابی کارروائی میں دہشت گرد فرار ہوگئے۔
وفاقی وزیر داخلہ محسن نے فتنۃ الخوارج کے حملے میں شہید فیڈرل ریزرو پولیس کے 3 جوانوں کو بھرپور خراج عقیدت پیش کیا،انہوں نے واضح کیاکہ بہادر جوانوں نے جان دےکر بھارتی حمایت یافتہ دہشت گردوں کا حملہ ناکام بنایا، شہید جوانوں کی جرات اور بہادری کو سلام پیش کرتےہیں، شہداء کی قربانی رائیگاں نہیں جائے گی،انہوں نے زخمیوں کی جلد صحتیابی کےلیے دعا بھی کی۔
