ہارون اختروزیراعظم کے مشیر صنعت و پیداوار مقرر
حکومت نے ہارون اختر کی وزیراعظم کے مشیر برائے صنعت و پیداوار کی حیثیت سے تقرری کا باضابطہ نوٹیفکیشن جاری کر دیا جس کے تحت انہیں وفاقی وزیر کا درجہ حاصل ہوگا۔
ہارون اختر کی تقرری صدرِ پاکستان کی جانب سے کی گئی ہے جبکہ کابینہ ڈویژن نے اس حوالے سے باضابطہ نوٹیفکیشن جاری کر دیا۔
ہارون اختر فوری طور پر وزیراعظم کے مشیر کی حیثیت سے اپنی ذمہ داریاں سنبھالیں گے اور صنعت و پیداوار کا قلمدان بھی ان کے پاس رہے گا۔
ہارون اختر کا کاروباری کامیابی اور عوامی خدمت کا نمایاں ریکارڈ ہے، وہ دو مرتبہ سینیٹر اور دو مرتبہ پنجاب اسمبلی کے رکن منتخب ہو چکے ہیں۔
