ہائیکورٹ کاپی ٹی آئی کی جلسے کی درخواست پرجلدفیصلےکاحکم

لاہورہائیکورٹ نے تحریک انصاف کی جانب سے 8فروری کو مینارپاکستان گراؤنڈ میں جلسے کی اجازت دینے کی درخواست پر ڈپٹی کمشنر کو جلد فیصلہ کرنےکاحکم دیدیا۔

لاہورہائیکورٹ نے پی ٹی آئی کے مینار پاکستان جلسے کے حوالے سے ڈپٹی کمشنر کو آج ہی درخواست پر فیصلہ کرنے کا حکم جاری کردیا۔

 تحریک انصاف کی 8 فروری کو مینارِ پاکستان لاہور میں جلسے کی اجازت  کے معاملے پر درخواست کی سماعت  لاہور ہائی کورٹ کے جسٹس فاروق حیدر نے کی۔

جسٹس فاروق حیدر نے کہا کہ ڈپٹی کمشنر لاہور آج شام 5 بجے تک جلسے کی اجازت کی درخواست پر فیصلہ کریں۔

 قبل ازیں عدالتی حکم پر چیف سیکرٹری پنجاب عدالت کے روبرو پیش ہوئے۔

لاہورہائکیورٹ نے چیف سیکرٹری پنجاب سے استفسار کیا کہ کیا آپ نے رپورٹ دیکھی ہے؟آئین کا آرٹیکل 10 اے بھی دیکھنا ہے۔ اگر میٹنگ کل ہوتی ہے اور ان کی جلسے کی اجازت مسترد ہوجاتی ہے تو آپ کہاں جائیں گے؟۔ اگر آپ جلسے کی اجازت دیتے ہیں تو ایک دن میں تیاری ممکن کیسے ہوگی؟۔ اگر آپ ان کی درخواست پر آج فیصلہ کردیں گے تو کیا حرج ہے۔

چیف سیکرٹری پنجاب نے عدالت کو بتایا کہ عدالت جو حکم دے گی اس پر عمل کریں گے، جس پر عدالت نے ریمارکس دیے کہ آپ سے اسی جواب کی توقع تھی۔