اگر ججز یرغمال ہیں تو عوام کو بتایا جائے، تاکہ انہیں آزاد کرائیں ، سہیل آفریدی

وزیراعلیٰ خیبر پختونخوا سہیل آفریدی نے کہا ہے کہ اگر ججز یرغمال ہیں تو عوام کو آگاہ کیا جائے تاکہ انہیں آزاد کرایا جا سکے۔

وزیراعلیٰ ہاؤس پشاور میں جسٹس لائرز فورم میں 94 وکلاء کی شمولیت کی تقریب سے خطاب کرتے ہوئے سہیل آفریدی نے کہا کہ ان کی عمران خان سے ملاقات کروانے کے عدالتی احکامات کو نظر انداز کر دیا گیا۔ انہوں نے مزید کہا کہ سڑک پر بیٹھنا ان کی کمزوری نہیں بلکہ عدالتوں کی بے بسی ہے جو اپنے احکامات پر عملدرآمد کرانے سے قاصر ہیں۔

سہیل آفریدی نے واضح کیا کہ حکومت ایک ریاست، دو دستور کے کلچر کو ختم کرنے کی جدوجہد میں ہے۔ ان کا کہنا تھا کہ 26 ویں آئینی ترمیم نے عدالتوں کو غیر فعال کر دیا ہے۔ ان کے بقول، ان کی جدوجہد حقیقی آزادی، آئین و قانون کی بالادستی، اور میڈیا کی آزادی کے لیے ہے، جس میں وکلاء برادری کا مرکزی کردار ہے۔

وزیراعلیٰ نے کہا کہ صوبے کی بار ایسوسی ایشنز کے لیے 42 کروڑ روپے کی گرانٹس منظور ہو چکی ہیں جو چند دنوں میں فراہم کی جائیں گی۔ انہوں نے مزید کہا کہ آئین و قانون کو کمزوروں کے لیے جال اور طاقتور کے لیے راستہ بنانے کی اجازت نہیں دیں گے، اور انصاف سب کے لیے برابر ہوگا۔ طاقتور یا غیر منصفانہ افراد کو بھی انصاف کے کٹہرے میں لانا ضروری ہے۔