ویسٹ انڈیز اور پاکستان کے دوسرے ٹیسٹ میچ میں امام الحق کی شمولیت کا امکان

پاکستان اورویسٹ انڈیز کی کرکٹ ٹیموں کےدرمیان ہفتے سےدوسرا اور آخری ٹیسٹ شروع ہو رہا ہے جس کے لیے پاکستانی اوپنر امام الحق کو ٹیم میں شامل کیا جاسکتا ہے۔
ملتان ہی میں کھیلےجانے والے پہلےٹیسٹ میں پاکستان نےویسٹ انڈیز کو میچ کے تیسرے دن 127 رنز سے شکست دی تھی۔
اب اطلاعات ہیں کہ تجربےکار اوپنر امام الحق کو دوسرے ٹیسٹ کے لیے پاکستانی ٹیم میں شامل کیا جاسکتا ہے۔
ویسٹ انڈیز کےخلاف پہلےٹیسٹ میں محمد حریرہ نے ٹیسٹ ڈیبیو کرتے ہوئےکپتان شان مسعود کے ساتھ اننگز کا آغاز کیا تھا،البتہ امام الحق کی ٹیم میں شمولیت کی صورت میں وہ حریرہ کےساتھ اننگ کا آغاز کریں گے جب کہ کپتان شان مسعود نمبر تین پر بیٹنگ کریں گے۔
ٹیم منیجمنٹ اور سلیکشن کمیٹی ملتان کی سلواور ٹرننگ پچ پراضافی بیٹر کھلانے کا ارادہ رکھتی ہے اور ایسی صورت میں ٹیم میں شامل واحد فاسٹ بولرخرم شہزاد کو ڈراپ کیا جاسکتا ہے۔
29 سال کےامام الحق نے پاکستان کے لیے آخری ٹیسٹ دسمبر 2023 میں میلبرن میں آسڑیلیا کے خلاف کھیلا تھا، بائیں ہاتھ کے بیٹس مین نے 24 ٹیسٹ کے دوران کھیلی گئی 46 اننگز میں 37.33 کی اوسط سے 1568 رنز بنا رکھے ہیں جن میں 3 سینچریاں اور 9 نصف سینچریاں بھی شامل ہیں۔
چیمپئنز ٹرافی: خوشدل شاہ بھی اسکواڈ میں شمولیت کی دوڑ میں شامل
آئی سی سی چیمپئنز ٹرافی سے پہلے اَن فٹ صائم ایوب اور آؤٹ آف فارم عبداللہ شفیق کی عدم موجودگی میں سلیکشن کمیٹی تجربےکار امام الحق پر بھی نظر رکھے ہوئے ہے اور امام الحق کو ملتان کے دوسرے ٹیسٹ میں کھلانے کا باعث بھی یہی ہے۔
امام الحق نےپاکستان کے لیے 72 ون ڈے میچو ں میں 48.27 کی اوسط سے 3138 رنز 9 سینچریوں اور 20 نصف سینچریوں کی مدد سےبنا رکھے ہیں۔