اقوام متحدہ میں آج فلسطین پر اہم کانفرنس، وزیر اعظم بھی شریک ہوں گے
اقوام متحدہ میں آج فلسطین کے دو ریاستی حل سے متعلق ایک اعلیٰ سطحی کانفرنس منعقد ہوگی، جس کی قیادت سعودی عرب اور فرانس کر رہے ہیں۔ وزیر اعظم شہباز شریف اس اہم اجلاس میں شرکت کریں گے۔
دفتر خارجہ کے ترجمان کے مطابق وزیر اعظم شہباز شریف 26 ستمبر تک اقوام متحدہ کی جنرل اسمبلی کے سالانہ اجلاس میں شرکت کے لیے نیویارک میں موجود رہیں گے۔
ترجمان نے مزید بتایا کہ وزیر اعظم اجلاس میں کشمیریوں اور فلسطینیوں کے حقِ خود ارادیت کو اجاگر کریں گے، جبکہ وہ جنرل اسمبلی سے خطاب میں غزہ میں جاری انسانی بحران اور فلسطینی عوام کی مشکلات پر روشنی ڈالیں گے۔
اس کے علاوہ، وزیر اعظم عالمی چیلنجز جیسے دہشت گردی، ماحولیاتی تبدیلی اور اسلامو فوبیا کے حوالے سے پاکستان کا مؤقف بھی پیش کریں گے۔
دفتر خارجہ کے مطابق وزیر اعظم جنرل اسمبلی کے اجلاس کے دوران مختلف اعلیٰ سطحی تقاریب اور خصوصی سیشنز میں بھی شرکت کریں گے، اور اسلامی ممالک کے رہنماؤں کے ساتھ امریکی صدر سے ملاقات کا امکان بھی ہے۔
وزیر اعظم شہباز شریف کی اقوام متحدہ کے حکام اور عالمی رہنماؤں سے دو طرفہ ملاقاتیں بھی متوقع ہیں۔
