عمران خان نے آرمی چیف سے پالیسیوں میں تبدیلی کی اپیل کی ،بیرسٹرگوہر

پی ٹی آئی کے چیئرمین بیرسٹرگوہرکاکہناہے کہ عمران خان نے بطور سابق وزیراعظم آرمی چیف کو خط لکھ کر پالیسیوں میں تبدیلی کی اپیل کی ہے۔

بیرسٹرگوہرکااڈیالہ جیل کے باہر صحافیوں سے گفتگو میں کہنا تھا کہ عمران خان نے آرمی چیف کو اوپن لیٹر لکھا ہے جس کومیڈیا کے سامنے بھی پیش کردیا جائے گا، جس میں عمران خان نے کہا کہ وہ پاکستان کے سابق وزیراعظم اور ملک کی سب سے بڑی سیاسی جماعت کے سربراہ کے طور پر خط لکھ رہے ہیں۔عمران خان نے خط میں فوج اور عوام کے درمیان فاصلے کی وجوہات بیان کرتے ہوئے لکھا کہ ’فوج اور عوام میں خلیج نہیں بڑھنا چاہیے جس کیلئے انہوں نے آرمی چیف سے پالیسیوں پر نظر ثانی کی درخواست کی ہے۔

واضح رہے کہ گزشتہ ماہ آرمی چیف جنرل عاصم منیر کی بیرسٹر گوہر اور علیم امین گنڈا پور کے درمیان ملاقات کی خبریں سامنے آئی تھیں، تاہم دونوں جانب سے متضاد دعووں کی وجہ سے ملاقات کا ایجنڈا سامنے نہ آسکا تھا۔ بیرسٹرگوہرنے کسی بھی قسم کے رابطے کی تردید کی تھی لیکن بعد میں انہوں نے آرمی چیف سے ملاقات کی تصدیق کرتے ہوئے ’مثبت جواب‘ ملنے کا دعویٰ کیا۔

تاہم سیکیورٹی ذرائع سے منسوب ایک بیان میں کہا گیا تھا کہ بات چیت کو سیاق و سباق سے ہٹ کر پیش کیا گیا، کوشش کی گئی کے سیکیورٹی امور پر بات چیت کو سیاسی رنگ دیا جائے۔

بیرسٹر گوہر نے مزیدکہا کہ عمران خان نے آرمی چیف کو لکھے خط میں افواج پاکستان کی قربانیوں کا اعتراف کیا، ان کا کہنا تھا کہ یہ فوج اور ملک ہمارا ہے، ہم انتشار نہیں چاہتے۔خط میں ان کا کہنا تھا کہ ساری چیزوں کا نزلہ فوج پر گررہا ہے، 2024 کا الیکشن، 26ویں آئینی ترمیم، پیکا ایکٹ فوج اور عوام کے درمیان فاصلے کی وجوہات ہیں۔

چیئرمین پی ٹی آئی نے کہا کہ عمران خان نے کہا کہ کمرہ عدالت میں 9 صحافیوں کو خط کی تفصیل بتائی ہے۔