عمران خان صحتمندہیں،طبیعت خرابی کی خبر میں صداقت نہیں،علیمہ خان

سابق وزیراعظم  عمران خان کی بہن علیمہ خان کا کہنا ہےکہ عمران خان کی صحت خراب ہونے میں کوئی صداقت نہیں، ان سےفیملی کی ملاقات ہوئی ہے  وہ صحت مند ہیں۔

عمران خان سے ملاقات کے بعد اڈیالہ جیل کےباہر میڈیا سےگفتگو  میں علیمہ خان کا کہنا تھا کہ بانی پی ٹی آئی کو سیل میں سہولیات مل رہی ہیں، بانی پی ٹی آئی  عمران خان نے واضح کیا ہے آپ جو مرضی پریشر ڈال لیں ڈیل نہیں کروں گا۔

علیمہ خان کا کہنا تھا کہ انہیں عمران خان نےبتایا کہ بشریٰ بی بی کو قید تنہائی میں رکھا گیا ہے، ان کی بشریٰ بی بی سے ملاقات نہیں کروائی گئی، آج بھی جیل انتظامیہ نے کہا کہ آرڈر ہے بشریٰ بی بی سےملاقات نہیں کروانی۔

علیمہ خان نے بتایا کہ جیل سے2کلومیٹر پہلےہماری گاڑی روکی گئی، وکلا کو  روکا گیا،  سلمان اکرم راجہ اور ایڈووکیٹ جنرل کےپی کو روکا گیا، ہمیں بھی 50 منٹ روکا گیا پھر اجازت ملی تو  ہمیں اڈیالہ  آنےدیا گیا۔ان کا کہنا تھا کہ  جیل رولز  اور کورٹ آرڈر کی یہاں کوئی وقعت نہیں ہے،کوئی بانی پی ٹی آئی عمران خا کو نہیں مل رہا تو ایسی خبریں ان کی میڈیا فیکٹری سے نکل رہی ہیں، مجھ سے منسوب اسکرین شاٹ فیک ہیں یہ خود بنا رہے ہیں، آپ نےمیرےفون سے یہ چیزیں نکال بھی لی ہیں تو لائیں عدالت میں پیش کریں۔

سلمان اکرم راجہ نےمیڈیا سےگفتگو میں کہا کہ ہم ایک بجےکےیہاں آئے ہوئے تھے لیکن ملاقات نہیں کرنے دی گئی، اچھی بات یہ ہے بہنوں کی ملاقات ہوئی، فیملی کے 5 ممبران ملے، علیمہ خان نے بتایا بانی پی ٹی آئی کی صحت بلکل ٹھیک ہے۔

سلمان اکرم راجہ کا کہنا تھا کہ  راستےروکنا بچگانہ قسم کی حرکت ہے، یہ سمجھتے ہیں اس طرح بانی پی ٹی آئی پردباؤ ڈالا جاسکتا ہے، انہیں لگتا ہے  راستے بند کرنے اور  ملاقات نہ کرانے سےبانی پی ٹی آئی عمران خان دباؤ میں آجائیں گے، یہ بانی پی ٹی آئی کو نہیں سمجھ سکے وہ کسی دباؤ  میں نہیں آئیں گے۔