عمران خان اسٹیبلشمنٹ سے بات کرنا چاہتے ہیں : رانا ثنا اللہ

وزیر اعظم کے مشیر برائے سیاسی رانا ثنا اللہ کا کہنا ہے کہ مریم نواز کا مؤقف درست ہےاور اس حوالے سے باقاعدہ شواہد موجود ہیں کہ عمران خان اسٹیبلشمنٹ سے بات کرنا چاہتے ہیں اور خود اس کا اظہار کرچکے ہیں۔

مرکزی رہنما مسلم لیگ ن رانا ثنا اللہ نے کہا کہ عمران خان این آر او اور ریلیف لینے کےخواہاں ہیں، لیکن آج تک وہ یہ نہیں بتاسکے کہ انہیں کس نے آفر کی تھی۔

رانا ثنا اللہ نے واضح کیاکہ حکومت کی جانب سے عمران خان کو کوئی آفر نہیں دی گئی،البتہ مذاکرات کی دعوت ضرور دی گئی تھی، کیوں کہ جمہوریت میں ڈائیلاگ کےذریعے ہی مسائل حل ہوتے ہیں۔

انہوں نے کہاکہ ہم نے کبھی مذاکرات سے انکار نہیں کیا اور نہ ہی کسی ڈیل،رہائی یا کیسز ختم کرنےکی بات ہوئی۔

سینئر رہنما مسلم لیگ ن رانا ثنا اللہ نے پی ٹی آئی کو آئین و قانون کے دائرے میں رہ کر احتجاج کرنے کا مشورہ دیا اور کہاکہ ملک اس وقت دوبارہ اپنے پاؤں پر کھڑا ہورہا ہے،ایسے میں کوئی بحران پیدا نہیں ہونا چاہیے۔

رانا ثنا اللہ نےکہا کہ وزیر اعظم نے پی ٹی آئی کو فلور آف دی ہاؤس مذاکرات کی پیش کش کی تھی۔

رانا ثنا اللہ کا عارف علوی کے خلاف کارروائی کا عندیہ

انہوں نے کہاکہ ملک کو بحران سے نکالنے کےلیے تمام سیاسی جماعتوں کو سر جوڑ کر بیٹھنا ہوگا، کیوں کہ سیاسی استحکام ہی معاشی استحکام کی راہ ہموار کرےگا،جس سے عام آدمی کی حالت بہتر ہوگی اور روزگار کےمواقع پیدا ہوں گے۔

ان کا کہنا تھا کہ اگر کسی کو 26ویں آئینی ترمیم پر اعتراض ہےتو اسے عدالت یا پارلیمنٹ سے رجوع کرنا چاہیے۔