اسرائیل کاغزہ میں امدادی مرکزپرحملہ،31فلسطینی شہید

اسرائیلی افواج نے جنوبی غزہ کے شہر رفح میں ایک امریکی حمایت یافتہ امدادی مرکز پر بمباری کردی،31 فلسطینی شہید اور 120 سے زائد زخمی ہو گئے۔

غزہ کی وزارتِ صحت کے مطابق، اکتوبر 2023 سے جاری جنگ میں اب تک 54 ہزار سے زائد فلسطینی شہید اور 1 لاکھ 24 ہزار زخمی ہو چکے ہیں۔ جبکہ حکومتِ غزہ کے مطابق شہادتوں کی تعداد 61,700 سے تجاوز کر چکی ہے۔

ایک اور اندوہناک واقعے میں اسرائیلی حملے میں زخمی ہونے والے ڈاکٹر حمدی النجار زخموں کی تاب نہ لاتے ہوئے شہید ہو گئے۔ اس حملے میں ان کے 9 بچے بھی شہید ہوئے تھے، صرف 11 سالہ بیٹا زندہ بچا ہے۔

غزہ حکومت کے مطابق امدادی مراکز کو نشانہ بنانا درحقیقت انہیں "موت کے جال” میں بدلنا ہے، جس کا مقصد شہریوں کو جان بوجھ کر حملے کا نشانہ بنانا ہے۔ اس میں امریکا کو بھی ذمہ دار ٹھہرایا جا رہا ہے جو ان مراکز کو مالی اور سیاسی معاونت فراہم کرتا ہے۔

ادھر سعودی وزیر خارجہ اردن پہنچ گئے ہیں تاکہ عرب وزرائے خارجہ کے اجلاس میں غزہ پر اسرائیلی حملوں کی روک تھام کے لیے اقدامات کیے جا سکیں۔

دوسری جانب اسرائیلی وزیرِ اعظم نیتن یاہو پر نہ صرف اندرونِ ملک بلکہ جرمنی، فرانس اور برطانیہ جیسے قریبی اتحادیوں کی جانب سے بھی شدید تنقید کی جا رہی ہے۔