اسرائیل کے تہران پرحملے، ایران کا فضائی دفاعی نظام فعال ہوگیا
اسرائیل نے تہران پرحملے شروع کردیئے،ایران کےصوبوں میں فضائی دفاعی نظام کو فعال کر دیا گیا، جبکہ اسرائیلی فوج نے مغربی ایران میں زیر زمین میزائل تنصیبات کو نشانہ بنانے کا دعویٰ کیا ہے۔
رپورٹ کے مطابق صہیونی فوج نے بتایا کہ مغربی ایران کے خرم آباد میں زیر زمین تنصیب کو نشانہ بنایا، جہاں پر زمین سے زمین پر مار کرنے والے کروز میزائل موجود تھے۔
فوجی ترجمان بریگیڈیئر جنرل ایفی ڈیفرین نے صحافیوں کو بتایا کہ یہ ایک اہم سائٹ ہے، جسے ماضی میں ایرانی حکومت کی جانب سے ایک ویڈیو میں بھی دکھایا گیا تھا۔
جنرل ایفی ڈیفرین نے دعویٰ کیا کہ اس طرح کے درجنوں دیگر مقامات کو بھی تباہ کر دیا گیا ہے۔
مزید کہنا تھا کہ اس جگہ پر زمین سے زمین پر مار کرنے والے میزائلوں اور کروز میزائلوں کے ساتھ ساتھ متعدد لانچ شافٹوں کے لیے ذخیرہ کرنے والی سرنگیں موجود تھیں۔
تسنیم نیوز ایجنسی نے رپورٹ کیا کہ فضائی دفاعی نظام تہران اور ملک کے جنوب میں ہرمزگان کے صوبوں، مغرب میں کرمانشاہ اور لرستان، مرکز میں قم، شمال مغرب میں مشرقی آذربائیجان اور جنوب مغرب میں خوزستان پر ’دشمن کے اہداف‘ کا جواب دے رہا ہے۔
’الجزیرہ‘ نے ایرانی خبر رساں ایجنسی کے حوالے سے رپورٹ کیا کہ اسرائیلی حملے کے بعد تبریز اور اصفہان میں فضائی دفاع کو بھی فعال کر دیا گیا ہے۔
دفاعی نظام دارالحکومت تہران اور بندر عباس کے شہر میں فعال کر دیا گیا تھا، کیونکہ وہاں اسرائیلی حملے کیے گئے تھے جبکہ ایران میں دھماکوں کی آوازیں سنائی دے رہی ہیں۔صہیونی فوج کی جانب سے ہرمزگان، کرمانشاہ، مغربی آذربائیجان، لرستان، خوزستان میں اہداف کو نشانہ بنایا گیا ہے۔
اسرائیل نے کچھ دیر پہلے کہا تھا کہ ایران پر حملوں کی ایک نئی لہر شروع کر دی ہے۔
