مسلم ممالک کے مشترکہ اقدامات سے غزہ معاملے پر جلد پیش رفت کا امکان ہے : خواجہ آصف
وزیر دفاع خواجہ آصف کا کہنا ہے کہ مسلم ممالک نے غزہ کے معاملے پر مل کر ایک حل دینے کی کوشش کی ہے،ایک بیچ بویا گیا ہے، ہوسکتا ہے 5 یا 10 دن میں کوئی نتیجہ سامنے آجائے۔
وفاقی وزیر خواجہ آصف کا کہنا تھا کہ امریکی صدر ڈونلڈ ٹرمپ کی مسلم ممالک کے سربراہوں سے ملاقات میں غزہ میں قیام امن کے حوالے سے بات ہوئی ہے اور اس کے بعد صدر ڈونلڈ ٹرمپ کا حوصلہ افزا بیان سامنے آیا ہے۔
مرکزی رہنما مسلم لیگ ن خواجہ آصف نے کہا کہ پاکستان کی سفارتی محاذ پر آؤ بھگت صرف دکھاوا نہیں بلکہ حقیقت ہے۔اقوام متحدہ میں امریکی وفد ہم سے بڑی گرم جوشی سے ملا،دیگر وفود بھی پاکستان کو بڑی اہمیت دےرہے ہیں۔
واضح رہے کہ گزشتہ روز نیویارک میں صدر ٹرمپ کی اسلامی ممالک کے سربراہان سے ملاقات ہوئی،تقریباً 50 منٹ جاری رہنے والی اس ملاقات میں غزہ سمیت مشرق وسطیٰ کی صورت حال پر تفصیلی گفتگو ہوئی۔صدر ٹرمپ نے میڈیا سے گفتگو کرتےہوئے مسلم رہنماؤں سے ملاقات کو انتہائی کامیاب قراردیا تھا۔
صدر ٹرمپ نے کہا تھاکہ غزہ کے بارے میں ان کی عظیم رہنماؤں کے ساتھ یہ بہت اچھی اور کامیاب ملاقات رہی ہے۔
