موسمیاتی تبدیلیوں سے پاکستان سب سے زیادہ متاثر ہوا: شہباز شریف

وزیراعظم شہباز شریف کا کہنا ہے کہ پاکستان دنیا کے اُن ممالک میں شامل ہے جو موسمیاتی تبدیلیوں سے شدید متاثر ہوئے ہیں،قرض موسمیاتی تبدیلیوں سے نمٹنے کا حل نہیں۔

اقوام متحدہ کی جنرل اسمبلی اجلاس کے موقع پر موسمیاتی تبدیلیوں سے متعلق سربراہی اجلاس سے خطاب کرتے ہوئے وزیراعظم شہباز شریف نے کہا کہ پاکستان ماحولیات کے تحفظ اور گرین ہاؤس گیسز کے اخراج میں کمی کےلیے سنجیدہ کوششیں کررہا ہے۔

وزیراعظم نے کہا کہ پاکستان میں متبادل توانائی اور گرین انرجی کو فروغ دیا جا رہا ہے،ماحولیاتی تحفظ کےلیے ترجیحی بنیادوں پر شجر کاری کی جارہی ہے۔

ان کاکہنا تھاکہ پاکستان موسمیاتی تبدیلیوں سے شدید متاثرہ ملکوں میں شامل ہے،2022 کے سیلاب میں پاکستان نے 30 ارب ڈالر سے زائد کا نقصان اٹھایا۔

وزیراعظم شہباز شریف نے عالمی برادری پر زور دیا کہ وہ اپنے وعدے پورے کرے، پاکستان ماحولیاتی بحران سے نمٹنے کےلیے اپنا کردار ادا کرنے کو تیار ہے لیکن قرض پر قرض کسی مسئلے کا پائیدار حل نہیں۔