کراچی میں ایک بار پھر لسانی فسادات پھوٹنے کا خطرہ کیوں؟
کراچی کی سیاست ایک بار پھر حساس موڑ پر کھڑی دکھائی دیتی ہے۔ 29 نومبر کو سندھ ترقی پسند پارٹی اور متحدہ قومی موومنٹ پاکستان کی جانب سے نئے انتظامی یونٹس کے معاملے پر ایک ہی روز ریلیاں نکالنے کے اعلانات نے سیاسی اور انتظامی حلقوں میں تشویش پیدا کر دی ہے۔ دونوں جماعتوں کے کارکنان اگر ایک ہی علاقے اور راستوں پر آمنے سامنے آگئے تو صورت حال کشیدہ ہونے کا خدشہ ہے۔ ماضی کے تلخ واقعات کے تناظر میں یہ سوال بھی اٹھ رہا ہے کہ کیا کراچی ایک بار پھر لسانی کشیدگی اور سیاسی تصادم کی طرف دھکیلا جا رہا ہے؟
روزنامہ امت کی ایک رپورٹ کے مطابق سندھ ترقی پسند پارٹی کے سربراہ ڈاکٹر قادر مگسی نے اکتوبر کے آخر میں حیدرآباد میں ہونے والی آل پارٹیز کانفرنس کے دوران کراچی میں احتجاجی ریلی نکالنے کا اعلان کیا تھا۔ ابتدائی طور پر یہ ریلی 15 نومبر کو نکالی جانی تھی، تاہم بعد میں تاریخ تبدیل کرکے 29 نومبر مقرر کردی گئی۔ دوسری جانب سندھ رہبر کمیٹی، جس میں سندھ عوامی تحریک، سندھ یونائیٹڈ پارٹی اور مختلف قوم پرست جماعتیں شامل ہیں، نے 22 نومبر کو کراچی میں احتجاج کا اعلان کیا ہے۔ صورتحال اس وقت زیادہ حساس ہوگئی جب ایم کیو ایم پاکستان نے بھی 29 نومبر کو شارع فیصل سے نئے انتظامی یونٹس کے حق میں ریلی نکالنے کا اعلان کردیا۔ سندھ ترقی پسند پارٹی کی مجوزہ ریلی کا راستہ گلشن حدید سے ملیر، شارع فیصل اور پھر کراچی پریس کلب تک بتایا گیا ہے۔ یوں دونوں جماعتوں کے احتجاجی پروگراموں میں ممکنہ طور پر راستوں کا ٹکراؤ پیدا ہوسکتا ہے۔
سیاسی اور صحافتی حلقوں میں اس صورت حال کا موازنہ 1980ء اور 1990ء کی دہائی کی لسانی کشیدگی سے کیا جا رہا ہے۔ 30 ستمبر 1988ء کو حیدرآباد میں ہونے والے قتل عام اور اس کے اگلے روز کراچی میں پیش آنے والے واقعات آج بھی سندھ کی اجتماعی یادداشت کا حصہ ہیں۔ ان واقعات میں دونوں جانب کے افراد کی بڑی تعداد جان سے گئی تھی اور مختلف سیاسی قوتوں پر الزامات بھی عائد کیے جاتے رہے۔
مبصرین کے مطابق کراچی کے شہری ماضی کی بدامنی اور لسانی تقسیم کے نتائج بھگت چکے ہیں، اس لیے موجودہ حالات میں سیاسی قیادت کی ذمہ داری ہے کہ اختلاف کو تصادم میں تبدیل نہ ہونے دے۔ اگرچہ مختلف حلقوں کا کہنا ہے کہ سندھی اور اردو بولنے والے شہریوں کی سوچ میں وقت کے ساتھ تبدیلی آئی ہے اور عمومی طور پر لوگ امن چاہتے ہیں، تاہم کسی بھی بڑے اجتماع میں اشتعال انگیزی کے امکان کو نظرانداز نہیں کیا جاسکتا۔
صوبائی محکمہ داخلہ کے مطابق سندھ بھر میں ایک ماہ کے لیے دفعہ 144 نافذ کی گئی ہے، جس کے تحت کسی بھی جماعت کو ریلی نکالنے کی اجازت نہیں دی گئی۔ سینئر صوبائی وزیر شرجیل انعام میمن پہلے ہی اعلان کرچکے ہیں کہ ایم کیو ایم کو ریلی کی اجازت نہیں دی جائے گی اور خلاف ورزی کی صورت میں قیادت کے خلاف گرفتاریوں سمیت کارروائی کی جاسکتی ہے۔میئر کراچی بیرسٹر مرتضیٰ وہاب نے بھی ایم کیو ایم کی جانب سے اسی روز ریلی نکالنے کے اعلان پر تشویش ظاہر کرتے ہوئے خدشہ ظاہر کیا ہے کہ کہیں 12 مئی 2007ء جیسے حالات دوبارہ پیدا نہ ہوجائیں۔ محکمہ داخلہ کے ذرائع کے مطابق حکومت کی کوشش ہے کہ دونوں جماعتوں کے کارکنان ایک دوسرے کے سامنے نہ آئیں۔ ضرورت پڑنے پر سندھ ترقی پسند پارٹی کی ریلی کا راستہ تبدیل کرنے یا اسے ملیر تک محدود کرنے کا آپشن بھی زیر غور آسکتا ہے۔
تجزیہ کاروں کے مطابق نئے انتظامی یونٹس کا معاملہ اب محض سیاسی مؤقف یا آئینی بحث تک محدود نہیں رہا بلکہ کراچی میں امن و امان کا مسئلہ بھی بنتا جا رہا ہے۔ پیپلز پارٹی کی صوبائی حکومت کے لیے اصل امتحان یہ ہوگا کہ وہ ایک طرف سیاسی جماعتوں کے احتجاج کے حق اور دوسری طرف شہریوں کے تحفظ کے درمیان توازن کیسے قائم کرتی ہے۔حکومت کے لیے ضروری ہے کہ وہ بروقت انتظامی اقدامات، واضح پابندیوں اور تمام سیاسی جماعتوں سے رابطے کے ذریعے کسی ممکنہ تصادم کو روکے۔ 29 نومبر کا دن اس حوالے سے سندھ حکومت، سیاسی قیادت اور قانون نافذ کرنے والے اداروں کی صلاحیت کا امتحان ہوگا۔ کراچی کے شہریوں کے لیے سب سے اہم بات یہی ہے کہ سیاسی اختلافات کے باوجود شہر کا امن برقرار رہے اور ماضی کے خونیں واقعات کو دوبارہ دہرانے کی نوبت نہ آئے۔
