پاکستان تحریک انصاف کے چیئرمین عمران خان کے وکیل نعیم حیدر پنجوتھا کو گرفتار کر لیا گیا ہے، ذرائع کا کہنا ہے کہ نعیم حیدر پنجوتھا تفتیش کےلیے ایف آئی اے ہیڈ کوارٹرز گئے تھے۔

واضح رہے کہ ایف آئی اے نے جج ہمایوں دلاور کی پوسٹ کی تحقیقات کے لیے نعیم پنجوتھا کو طلب کیا تھا، نعیم حیدر پنجوتھا چیئرمین پی ٹی آئی کے قانونی امور پر ترجمان ہیں، پی ٹی آئی کے چیئرمین کے وکیل نعیم حیدر پنجوتھا ایف آئی اے سائبر کرائم آفس پہنچے تھے، انہیں ایف آئی اے اسلام آباد نے آج صبح 10 بجے طلب کر رکھا تھا۔

ایف آئی اے نوٹس کے مطابق نعیم حیدر کو جج ہمایوں دلاور کے خلاف جعلی سوشل میڈیا پوسٹ لگانے پر طلب کیا گیا، نوٹس میں مزید کہا گیا تھا کہ غیر حاضری پر سمجھا جائے گا کہ آپ کے پاس اپنے دفاع میں کہنے کیلئے کچھ نہیں تاہم نعیم پنجوتھا نے ایف آئی اے طلبی پر میڈیا سے گفتگو کرتے ہوئے کہا تھا کہ ایف آئی اے کے سامنے پیش ہو رہے ہیں، جو بھی سوال ہوگا بھرپور جواب دیں گے۔

نعیم پنجوتھا کا کہنا تھا کہ مجھے نہیں پتہ ایف آئی اے نے کس کیس میں طلب کیا ہے، تحریک انصاف کے وکیل شیر افضل مروت نے اپنے بیان میں کہا ہے کہ نعیم حیدر پنجوتھا کو ایف آئی اے نے گرفتار کر لیا، انکا کہنا تھا کہ نعیم پنجوتھا جج ہمایوں دلاور پوسٹس کی انکوائری کےلیے ایف آئی اے ہیڈکوارٹرز گئے تھے۔ نعیم پنجوتھا کے کلرک نے ان کی حراست کی تصدیق کی ہے، تاہم ابھی یہ واضح نہیں کہ نعیم پنجوتھا کو باضابطہ گرفتار کیا گیا ہے کہ نہیں۔

جویریہ اور شمعون کی بیٹی کی زندگی کا نیا سفر شروع