فتنہ الہندوستان و جعفر ایکسپریس حملے کا ماسٹر مائنڈ افغانستان میں ہلاک

فتنہ الہندوستان سے تعلق رکھنے والا دہشت گرد اور جعفر ایکسپریس حملے کا ماسٹر مائنڈ افغانستان میں ہلاک ہوگیا۔

سیکیورٹی ذرائع کے مطابق دہشت گرد گل رحمان عرف استاد مرید افغان صوبے ہلمند میں 17 ستمبر 2025 کو مارا گیا۔ بھارتی میڈیا اور سوشل میڈیا رپورٹس میں بھی اس کی ہلاکت کی تصدیق کی گئی ہے۔

ذرائع کے مطابق گل رحمان فتنہ الہندوستان مجید بریگیڈ کا ٹرینر اور آپریشنل کمانڈر تھا۔ وہ سیکیورٹی فورسز، چینی شہریوں، معصوم شہریوں اور مختلف ریاستی اداروں پر حملوں میں ملوث رہا۔

واضح رہے کہ فتنہ الہندوستان نے پاکستان میں نہتے شہریوں، سیکیورٹی فورسز اور سی پیک منصوبوں کو بارہا نشانہ بنایا۔ رواں برس مارچ میں بلوچستان کے علاقے بولان میں جعفر ایکسپریس پر حملے میں 26 افراد شہید جبکہ 350 سے زائد یرغمالیوں کو بازیاب کرایا گیا تھا، اس کارروائی میں فورسز نے 33 دہشت گرد بھی ہلاک کیے تھے۔